देऊळगाव राजे येथे मारहाण करून चोरी

देऊळगाव राजे, ता. ८ ः देऊळगाव राजे (ता. दौंड) येथील पोपट अप्पासाहेब आवचर (वय ७५) आणि त्यांची पत्नी नंदा आवचर (वय ६५) या ज्येष्ठ दांपत्याला मंगळवारी (ता. ८) रात्री चोरट्यांनी घरात घुसून मारहाण केली. त्यानंतर रोख रक्कम आणि सुमारे तीन लाख रुपयांचे सोन्या-चांदीचे दागिने चोरून नेले. या घटनेमुळे परिसरात भीतीचे वातावरण पसरले असून, दौंड पोलिसांनी घटनास्थळी भेट देत तपास सुरू केला आहे.
मिळालेल्या माहितीनुसार, आवचर दांपत्य रात्रीच्या जेवणानंतर घरात झोपले होते. मध्यरात्री १२ ते १ च्यादरम्यान तीन ते चार चोरटे कटावणीच्या साहाय्याने दरवाज्याची कडी तोडून घरात शिरले. त्यांनी दोघांनाही कानाजवळ आणि शरीरावर गंभीर मारहाण केली. ओरडल्यास ठार मारण्याची धमकी देत घरातील रोख रक्कम सुमारे पाच हजार रुपये आणि तीन लाख रुपये किमतीचे दागिने घेऊन चोरटे फरार झाले आहेत.
घटनेनंतर काही वेळाने आवचर दांपत्याने शेजारील नातेवाइकांना फोन करून माहिती दिली. पोलिस पाटील सचिन पोळ यांनी दौंड पोलिसांना माहिती दिल्यानंतर पोलिसांनी तातडीने घटनास्थळी पाहणी केली. दरम्यान, गेल्या महिनाभरात या भागात चार चोऱ्यांची नोंद झाली असून, चोरीचे सत्र न थांबल्यामुळे ग्रामस्थांमध्ये संतापाचे वातावरण आहे. सकाळी उपविभागीय पोलिस अधिकारी बापूराव डगस आणि पोलिस निरीक्षक गोपाळ पवार यांनी घटनास्थळाला भेट देऊन पाहणी केली.