रेटवडी, दावडी शाळांमध्ये विद्यार्थ्यांना हिशोबाचे धडे

दावडी, ता. ११ ः खेड तालुक्यातील रेटवडी (घाटवस्ती), दावडी (आमराळवाडी) व श्री क्षेत्र निमगाव खंडोबा (गावठाण) येथील जिल्हा परिषद शाळांमध्ये पुस्तकी ज्ञानाबरोबरच व्यवहारज्ञान, हिशोब यांचा अनुभव मिळावा या उद्देशाने भाजी बाजार व खाऊगल्ली या उपक्रमांचे आयोजन करण्यात आले होते. तीनही शाळा व्यवस्थापन समितीचे अध्यक्ष, उपाध्यक्ष, सदस्यांनी या उपक्रमास शुभेच्छा दिल्या. पालक व ग्रामस्थांनी उपस्थित राहून भाजी खरेदी, खाऊगल्लीतील पदार्थ यांचा आस्वाद घेतला. तसेच, आपल्या पाल्यांचा आनंद द्विगुणित करून या कार्यक्रमाची शोभा वाढवली. यावेळी एकूण १० ते १५ हजार रुपयांची उलाढाल झाली. तीनही शाळांचे मुख्याध्यापक तानाजी खैरे, रविकिरण भोसले व पवार मॅडम यांनी कार्यक्रमाचे नियोजन केले.