युगप्रवर्तक प्रतिष्ठानकडून आंबेगाव भूषण पुरस्कार घोषित

घोडेगाव, ता. १९ : घोडेगाव (ता. आंबेगाव) येथील युगप्रवर्तक प्रतिष्ठान महाराष्ट्र राज्याच्या वतीने भारतरत्न डॉ. बाबासाहेब आंबेडकर यांच्या जयंतीनिमित्त १४ एप्रिलला विविध क्षेत्रात उल्लेखनीय कार्य करणाऱ्या भूमिपुत्रांना ‘आंबेगाव भूषण पुरस्कार’ देऊन गौरविले जाणार आहे. या वर्षी शैक्षणिक क्षेत्रातील कामगिरीबद्दल नांदेड विद्यापीठाचे कुलगुरू व महाळुंगे पडवळ गावचे सुपुत्र डॉ. मनोहर चासकर, प्रशासकीय सेवेतील उत्कृष्ट कामगिरीबद्दल शिक्षण विभागाचे सहसचिव, अवसरी बुद्रूकचे भूमिपुत्र मंगेश शिंदे, औद्योगिक क्षेत्रातील कामगिरीबद्दल रामा ऑटोचे मालक व निरगुडसरचे रहिवासी अरविंद वळसे पाटील हे पुरस्कारार्थी आहेत. कलाक्षेत्रात अभिनेते व घोडेगावचे सुपुत्र रवी काळे, व्याख्यात्या अर्चना भोर करंडे यांनाही ‘आंबेगाव भूषण पुरस्कार’ देण्यात येणार आहे. हा सोहळा भारतरत्न डॉ. बाबासाहेब आंबेडकर यांच्या १३३ व्या जयंतीनिमित्त १४ एप्रिलला घोडेगाव येथे युगप्रवर्तक प्रतिष्ठानच्या वतीने देण्यात येणार असल्याची माहिती प्रतिष्ठानचे संस्थापक अध्यक्ष गौतमराव खरात यांनी दिली.