पोखरी येथे हिरडा महोत्सवचा प्रारंभ

घोडेगाव, ता. ६ : ‘‘निसर्गातील बदलांमुळे शेतकऱ्यांवर दरवर्षी वेगवेगळ्या संकटांचा सामना करावा लागतो. त्यामुळे पारंपरिक व पर्यावरण पूरक उत्पन्न स्तोत्राकडे वळण गरजेचे आहे. आदिवासी भागातील शेतकऱ्यांनी स्ट्रॉबेरी व हिरडा ही नगदी पिके घेण्याकडे लक्ष द्यावे,’’ असे मत माजीमंत्री दिलीप वळसे पाटील यांनी व्यक्त केले.

पोखरी (ता आंबेगाव) येथील श्री पंढरीनाथ महाविद्यालयात आयोजित दुसऱ्या ‘हिरडा महोत्सव २०२५’चा रविवारी (ता. ६) प्रारंभ माजी मंत्री दिलीप वळसे पाटील यांच्या उपस्थितीत करण्यात आला. यावेळी ते बोलत होते. वनविभाग जुन्नर अंतर्गत घोडेगाव वनपरिक्षेत्राच्या वतीने आयोजित या उपक्रमात पेसा क्षेत्रातील दहा हजारांहून अधिक आदिवासी शेतकऱ्यांना हिरड्याची मोफत रोपे वाटप करण्यात आली. यावेळी वृक्षारोपणही करण्यात आले.
यावेळी उपवनसंरक्षक प्रशांत खाडे, अमोल सातपुते, प्रकल्प अधिकारी प्रदिप देसाई, सहायक उपवनसंरक्षक अमृत शिंदे, वनपरिक्षेत्र अधिकारी कुणाल लिमकर, विकास भोसले तसेच समाज कल्याणचे माजी सभापती सुभाष मोरमारे, संजय गवारी, विष्णुकाका हिंगे, प्रकाश घोलप, नीलेश थोरात, प्रवीण पारधी, जनाबाई उगले, इंदुबाई लोहकरे, नंदकुमार सोनावळे, नीलेश बो-हाडे, बाळासाहेब कोळप, अमोल अंकुश, गौतम खरात, बुधाजी डामसे, प्राचार्य शशिकांत साळवे, सहायक पोलिस निरीक्षक सागर पवार, गटविकास अधिकारी अर्चना कोल्हे व ग्रामस्थ आणि आदिवासी बांधव उपस्थित होते.

यावेळी वळसे पाटील म्हणाले, पर्यावरण संवर्धन, शाश्वत शेती आणि ग्रामीण अर्थव्यवस्थेच्या सशक्तीकरणाच्या दिशेने हे पाऊल अत्यंत महत्त्वाचे आहे.
स्ट्रॉबेरी व हिरडा यासारखी पिके घेऊन कमी जोखमीच्या मार्गातून अधिक उत्पन्न मिळवता येईल. याआधी हिरड्याच्या नुकसानीबद्दल १४ कोटींची नुकसानभरपाई देण्यात आली होती, हे समाधानकारक आहे. वनउपज विक्रीसाठी लागणाऱ्या परवानग्या सुलभ करण्यासाठी वनविभागाने स्वतंत्र यंत्रणा तयार करावी, जेणेकरून दलालांचा हस्तक्षेप टाळून थेट शेतकऱ्यांच्या हातात मोबदला पोहोचू शकेल.

04034