घोडेगाव येथील अपघातात तिघांचा मृत्यू

घोडेगाव, ता. १६ : घोडेगाव जवळील पलस्टिका फाटा (ता आंबेगाव) येथील मंचर-घोडेगाव रस्त्यावर दुचाकी आणि आराम बसची मंगळवारी (ता. १५) दुपारी धडक झाली. या अपघातात दुचाकीवरील तीन युवकांचा मृत्यू झाला.
उत्तर प्रदेशची खासगी प्रवासी आराम बस ही भीमाशंकरच्या दिशेने जात होती. त्यावेळी दुचाकी घोडेगाववरून मंचरच्या दिशेने येत येतो. पळस्टीका फाट्यावर बस व दुचाकी धडक झाली. धडकेनंतर बसने दुचाकीला काही अंतर फरफटत नेले. अपघातात दुचाकीचा चेंदामेंदा झाला. अपघात झाल्यानंतर मंचर येथील देवेंद्रशेठ शहा फाउंडेशन आणि घोडेगाव ग्रामीण रुग्णालयाच्या खासगी रुग्णवाहिकेतून तीन युवकांना गंभीर जखमी अवस्थेत मंचर उपजिल्हा रुग्णालयात वैद्यकीय उपचारासाठी आणण्यात आले. त्यावेळी तिघांचाही मृत्यू उपचारापूर्वी झाल्याचे डॉक्टरांनी सांगितले. अपघातात कोळवाडी गावातील अथर्व संदीप खमसे (वय १८), गणेश रामभाऊ असवले (वय १८), भारत सुदाम वाजे (वय १८) या तीन युवकांचा मृत्यू झाल्याचे मंचर पोलिसांनी सांगितले. मंचर पोलिसांनी तीन मयत तरुणांचा पंचनामा केला आहे. घोडेगाव पोलिसांनी अपघातस्थळी भेट देवून पंचनामा केला आहे.अपघाताचा तपास घोडेगाव पोलिस ठाण्याचे सहाय्यक पोलिस निरीक्षक सागर पवार यांच्या मार्गदर्शनाखाली सुरू आहे.

04081