इंगवलेवाडीत बुडालेल्याचा ३० तासांनी मिळाला मृतदेह

घोडेगाव, ता. २३ : इंगवलेवाडी (ता. आंबेगाव) येथील पाझर तलावात बुडालेल्या देवराम सखाराम पारधी (वय ६०) यांचा मृतदेह गुरुवारी (ता. २१) सायंकाळी ६ वाजता आढळून आला. तब्बल ३० तासांहून अधिक वेळाने हा मृतदेह हाती लागला.
याबाबत सहायक पोलिस निरीक्षक सागर पवार यांनी माहिती दिली की, इंगवलेवाडी येथील पाझर तलावात देवराम पारधी व त्यांची पत्नी धोंडाबाई पारधी हे दोघे बुधवारी (ता. २०) सकाळी १० वाजता पडले होते. धोंडाबाई या दगडाचा आधार मिळाल्याने बचावल्या. त्यांना जवळील तरुणांनी बाहेर काढले. या घटनेची माहिती मिळताच तहसीलदार संजय नागटिळक, पोलिस निरीक्षक सागर पवार यांनी मदतीसाठी प्रयत्न केले. स्थानिक रेस्क्यू टिमचे सदस्य व आपदा मित्र धनंजय कोकणे, चंद्रकांत काळे, बाळासाहेब झोडगे, अमोल वाघमारे, विजय काळे, आनंद काळे यांनी तलावात शोधकार्य सुरू केले. ते बुधवारी अंधार पडल्यानंतर थांबविण्यात आले. गुरुवारी सकाळी पुन्हा शोधकार्य सुरू केले. दिवसभर शोध घेत असताना सायंकाळी ६ वाजता देवराम यांचा मृतदेह तलावातच आढळून आला.