नायफड, आसवालेवाडी मंडळास साहाय्य

घोडेगाव, ता. १६ : नायफड (ता. खेड) श्री कमलजादेवी नाट्य व आसवालेवाडी (ता. जुन्नर) समाज प्रबोधन मंडळास घोडेगाव (ता. आंबेगाव) येथील एकात्मिक आदिवासी प्रकल्प कार्यालयाने आर्थिक मदत केली आहे. यासाठी सोमवारी (ता. १५) येथील प्रकल्प कार्यालयात बैठक पार पडली.
पुणे जिल्ह्यातील आदिवासी कला व संस्कृतीचे जतन आणि संवर्धन करण्यासाठी एकात्मिक आदिवासी विकास प्रकल्प कार्यालय नेहमीच सक्रिय भूमिका घेत असते. देहू आणि आळंदीसारख्या संत परंपरेच्या तीर्थक्षेत्राजवळ असलेल्या या भागातील आदिवासी गावांमध्ये भजन, कीर्तन, नाट्यकला आणि भारुड यांसारख्या कलांचा मोठा प्रसार आहे. मात्र, अनेक नोंदणीकृत गावपातळीवरील मंडळांना वाद्य आणि साहित्य खरेदीसाठी आर्थिक साहाय्य मिळत नसल्याने त्यांच्या कलेला प्रोत्साहन मिळत नव्हते. ही बाब लक्षात घेऊन, प्रकल्प अधिकारी प्रदीप देसाई यांनी दोन्ही मंडळांसाठी प्रत्येकी दोन लाख ५० हजार रुपयांचा निधी मंजूर केला आहे.
याप्रसंगी दोन्ही मंडळांनी कार्यालयाच्या आवारात त्यांच्या कलेचे सादरीकरण केले. प्रकल्प कार्यालयाच्या या सकारात्मक भूमिकेमुळे आदिवासी कलाकारांना मोठा दिलासा मिळाला आहे. मंडळाचे अध्यक्ष आणि सदस्य सचिव यांनी प्रकल्प अधिकारी देसाई यांचे आभार मानले. यापुढेही आदिवासी बांधवांना विविध कलागुण विकसनासाठी प्रकल्प कार्यालयाकडून संधी उपलब्ध करून देण्यात येईल, असे आश्वासन देसाई यांनी यावेळी दिले.