गर्दीचा फायदा घेऊन मोबाईल लंपास

गुळुंचे, ता. १६ : पुरंदर तालुक्यातील मोठी ग्रामपंचायत असलेल्या नीरा शिवतक्रार येथील आठवडी बाजारात मोबाईल चोरांचा सुळसुळाट झाला आहे. गर्दीचा फायदा घेऊन बाजारहाट घेताना मोबाईल लांबवले जात असून स्थानिक पोलिसांकडून कोणत्याही प्रकारची उपाययोजना होत नसल्याचे दिसून येत आहे.
येथील प्रभाग दोन मध्ये बाजारतळ आहे. विक्रेत्यांना माल विकण्यासाठी सिमेंटचे चबुतरे केले आहेत. पंचक्रोशीतील ही मोठी बाजारपेठ असल्याने गुळुंचे, राख, कर्नलवाडी, नीरा, शिवतक्रार, पिंपरे, पाडेगाव तसेच अनेक वाड्यावस्त्यांवरून लोक बाजार घेण्यासाठी येतात. बुधवारी येथील आठवडी बाजार भरतो. दरम्यान, वाढत्या गर्दीला बाजारतळ अपुरा पडत आहे. त्यामुळे विक्रेते शाळा, मार्केटयार्डकडे जाणारा रस्ता, पंढरपूर पुणे मार्गावरून आत प्रभाग तीनमध्ये येणाऱ्या रस्त्यावर तसेच पुणे पंढरपूर महामार्गाच्या कडेला आपली दुकाने थाटत आहेत. त्यामुळे मुख्य मार्गावर वाहतूक विस्कळित होऊन गर्दी वाढत आहे. बाजारात देखील दाटीवाटीने दुकाने असल्याने वाढती गर्दी पाहायला मिळत आहे.

नेमक्या याच गर्दीचा फायदा घेत चोर खिशातील मोबाईल लांबवत आहेत. विशेषतः संध्याकाळी बाजारात होणाऱ्या गर्दीचा फायदा चोरटे घेत आहेत. गुळुंचे येथील यात्रा कमिटीचे पंच पोपट निगडे यांच्यासह आजवर अनेकांच्या मोबाईलवर चोरांनी डल्ला मारला आहे. त्यामुळे वेळीच या चोरांच्या मुसक्या आवळल्या जाणे गरजेचे आहे. पोलिसांकडून मात्र माहिती मिळूनही कारवाई होत नसल्याने आश्चर्य व्यक्त केले जात आहे.

बाजार करत असताना कुणी मोबाईल चोरला तेच समजले नाही. गर्दी प्रचंड होती त्यात अंधार होता. काही वेळानंतर मोबाईल चोरीला गेल्याचे समजले पण तोवर बराच उशीर झाला होता. अशा चोरांना वेळीच पोलिसांनी धडा शिकवावा.
- पोपट निगडे, ग्रामस्थ, गुळुंचे