सासवडमध्ये महिलांसाठी स्वच्छतागृहांची वानवा

सासवड शहर, ता. १५ : शहरातील वाढत्या लोकसंख्येचा विचार करता महिलांसाठी सार्वजनिक स्वच्छतागृहांची संख्या अपुरी पडत आहे. महात्मा फुले भाजी मंडई, छत्रपती शिवाजी मार्केट केवळ या दोन ठिकाणीच स्वच्छतागृहे आहेत. इतरत्र स्वच्छतागृहांची सोय करणे गरजेचे आहे.
माऊलींचा पालखी सोहळा मुक्काम आणि सासवड शहरातील वाढत्या लोकसंख्येचा विचार केला तर महिलांसाठी वाढीव स्वच्छता गृहे बांधावीत अशी नागरिकांची मागणी आहे.
लांडगे आळी येथे असलेले महिलांच्या स्वच्छतागृहाचा वापर खंडोबा नगर येथील झोपडपट्टीतील रहिवासी करत असल्याने हे स्वच्छतागृह कायम अस्वच्छ असल्याने इतर महिलांना त्याचा वापर करता येत नव्हता. त्यामुळे लांडगेवाडीतील रहिवाशांनी प्रशासनाला येथील स्वच्छतागृह बंद करण्याची मागणी केली होती. त्यानुसार येथील स्वच्छतागृह बंद करण्यात आल्याची माहिती आरोग्य अधिकारी मोहन चव्हाण यांनी दिली. तसेच ही वास्तू जुनी असून मोडकळीस आली आहे.

महात्मा फुले भाजी मंडई येथे महिलांसाठी स्वच्छतागृह आहे. पण येथे पाण्याचा तुटवडा असल्याने ते कायम अस्वच्छ असते.
सुनीता पवार, अध्यक्षा, भाजी विक्रेता संघटना

सासवड नगरपालिकेच्या आजपर्यंत लाभलेल्या लोकप्रतिनिधी आणि प्रशासनाच्या धोरणामुळे सासवड नगरपालिकेची लोकसंख्या वाढली तरी त्या प्रमाणात स्वच्छतागृहांची सोय नागरिकांच्या नशिबी नाही.
- डॉ. उदयकुमार जगताप