अवैध धंद्यांविरोधात रिपाइं करणार आंदोलन

सासवड शहर, ता. ८ : जेजुरी, सासवड (ता. पुरंदर) येथील पोलिस ठाण्याच्या हद्दीतील सर्व प्रकारचे अवैद्य धंदे बंद करण्यात यावेत. या मागणीसाठी सोमवारपासून (ता. १४) उपविभागीय पोलिस अधिकारी भोर विभाग, सासवड यांच्या कार्यालयासमोर रिपब्लिकन पार्टी ऑफ इंडिया आठवले श्रमिक ब्रिगेड यांच्या वतीने बेमुदत आंदोलन करण्यात येणार असल्याची माहिती रिपब्लिकन श्रमिक ब्रिगेडचे प्रदेश सरचिटणीस विष्णू भोसले यांनी दिली.
याबाबत मुख्यमंत्री देवेंद्र फडणवीस, उपमुख्यमंत्री अजित पवार, खासदार सुप्रिया सुळे, आमदार विजय शिवतारे, कोल्हापूर परिक्षेत्राचे विशेष पोलिस महानिरीक्षक सुनील फुलारे, पुणे जिल्हा ग्रामीण पोलिस अधीक्षक संदीप सिंग गील, उपविभागीय पोलिस अधिकारी भोर विभाग सासवड, तानाजी बरडे, सासवड पोलिस ठाण्याचे पोलिस निरीक्षक ऋषिकेश अधिकारी, जेजुरी पोलिस ठाण्याचे सहाय्यक पोलिस निरीक्षक दीपक वाघचौरे व राज्य उत्पादन शुल्क सासवड विभागाचे निरीक्षक यांना निवेदन दिले आहे.
सासवड व जेजुरी पोलिस ठाण्याच्या हद्दीत भर लोकवस्तीत अवैध मद्यविक्री, हातभट्टी दारू, जुगार, चक्री, मटका, ऑनलाइन मटका गांजा, गुटखा, हॉटेल ढाब्यावर अनधिकृतपणे मद्यविक्री या प्रकारचे अवैद्य धंदे राजरोसपणे सुरू आहेत. याबाबत सासवड पोलिस ठाण्यासमोर व उपविभागीय पोलिस अधिकारी भोर विभाग, सासवड यांच्या कार्यालयासमोर आंदोलन करूनही व उपविभागीय पोलिस अधिकारी भोर विभाग सासवड यांनी प्रशासनाकडून लेखी आश्वासन देऊनही अवैध धंदे बंद झाले नाहीत. याबाबत प्रशासकीय अधिकाऱ्यांना माहिती देऊनही याकडे दुर्लक्ष केले जात आहे. सासवड शहरात राज्य उत्पादन शुल्क विभागाचे कार्यालय आहे मात्र, ते असून नसल्यासारखे आहे. त्यामुळे झोपेचे सोंग घेतलेल्या पोलिस व राज्य उत्पादन शुल्क विभागाला जागे करण्यासाठी व सासवड व जेजुरी पोलिस ठाणे हद्दीतील सर्व प्रकारचे अवैद्य धंदे बंद करण्यात यावेत, यासाठी आंदोलन करणार असल्याचे भोसले यांनी सांगितले.