सासवडमधून माउलींची पालखी मार्गस्थ

सासवड शहर, ता. १७ : आज पहाटे मंदिरात माउलींची नित्याभिषेक पूजा होऊन नैवेद्य दाखविण्यात आला. सोपानदेव ट्रस्टचे मुख्य विश्‍वस्त त्रिगुण महाराज गोसावी, गोपाळ महाराज गोसावी, श्रीकांत महाराज गोसावी, गौतम महाराज गोसावी यांनी संत ज्ञानेश्‍वर महाराज पालखी सोहळा प्रमुख विश्‍वस्त भावार्थ देखणे यांचे स्वागत केले. त्यानंतर उत्सवमूर्ती पालखीत ठेऊन पालखीने देऊळवाड्यातून आळंदीकडे प्रस्थान ठेवले. भाविकांनी पालखी खांद्यावर घेऊन ‘ज्ञानेश्‍वर माउली, ज्ञानराज माउली, तुकारामच्या’ जयघोषात छत्रपती शिवाजी महाराज मंडळाचे येथे पालखी रथात ठेवण्यात आली. या वेळी प्रमुख विश्‍वस्त योगी निरंजननाथ आणि सदस्य चैतन्य महाराज कबीर, व्यवस्थापक माउली वीर आणि मानकरी उपस्थित होते. पालखी बरोबर मानाचे वारकरी, वीणेकरी आहेत. माउलींचे दर्शन घेण्यासाठी रात्री उशिरापर्यंत मंदिरात गर्दी केली होती. टाळ-मृदंगांचा गजर, हरिनामाच्या गजरात दिवे घाटातून पालखी वडकीत विसावली.
सासवड नगरपालिकेपुढे शिवतीर्थावर पालखी आल्यानंतर माजी नगरसेवक विजय वढणे, संदीप राऊत, सुभाष हिवरकर, मनोहर ताथवडकर, वकील नितीन जाधव, बाळासाहेब पवार, ईश्‍वर बागमार, सुशांत भांडवलकर, उत्तम धुमाळ आदींनी पालखीचे स्वागत केले.