सासवडमध्ये जिल्ह्यातील अंजीर, सीताफळ बागायतदारांची बैठक

सासवड शहर, ता. ३ : पुणे जिल्ह्यातील अंजीर व सीताफळ बागायतदारांची संख्या मोठी आहे. वेळोवेळी नवीन तंत्रज्ञानाची माहिती घेऊन कृषी विद्यापीठांच्या शिफारशीप्रमाणे अंजीर व सीताफळाची शेती करावी, त्यामुळे शेतकऱ्यांना आर्थिक संपन्नता येईल, असे विचार महाराष्ट्र कृषी शिक्षण व संशोधन परिषदेचे माजी उपाध्यक्ष विजय कोलते यांनी व्यक्त केले.
पुणे जिल्ह्यातील अंजीर व सीताफळ बागायतदारांची बैठक सासवड येथे कोलते यांच्या अध्यक्षतेखाली पार पडली. त्यावेळी ते बोलत होते. या संघाची नोंदणी सहाय्यक धर्मदाय आयुक्त यांच्यामार्फत करण्यात येणार असून, जिल्ह्यातील अंजीर व सीताफळ बागायतदारांनी यामध्ये सहभागी व्हावे, असे आवाहन राज्य सीताफळ संघाचे संचालक माउली मेमाणे यांनी केले. याप्रसंगी विजय पवार (इंदापूर), प्रदीप अहीर (जुन्नर), समीर डोंबे (दौंड), नितीन तावरे, दीपक जगताप (बारामती), नीलेश काळे, संतोष मस्के, देवराम काळे, शांताराम पोमण, पांडुरंग काळे (पुरंदर) यांच्यासह इतर शेतकरी उपस्थित होते.