पर्यायी उपचारात्मक पद्धती वापरा : डॉ. शेळके

सासवड शहर, ता. २३ : ‘स्वतःचे आरोग्य जपण्यासाठी आधुनिक उपचार पद्धतीं सोबतच ‘पर्यायी उपचारात्मक पद्धतीं’चा वापर समाजाने केला पाहिजे. तसेच ग्रामीण भागात विविध उपचार पद्धती पोहोचविणे ही आपली जबाबदारी आहे’, असे मत प्राचार्य डॉ. पंडित शेळके यांनी व्यक्त केले. पुणे जिल्हा शिक्षण मंडळाचे सासवड (ता. पुरंदर) येथील वाघिरे महाविद्यालयात विद्यार्थी व प्राध्यापक यांच्यासाठी कपिंग थेरपीचे शिबिर आयोजित करण्यात आले होते, त्यावेळी डॉ. शेळके बोलत होते.
पाठीचे दुखणे, स्नायूंचे व गुडघे दुखी स्नायूंवरील ताण, निद्रानाश, रक्तवाहिन्या फुगून झालेल्या नसांतीलगाठी आदी संबंधित आरोग्य समस्या असलेल्या विद्यार्थी व प्राध्यापकांनी या शिबिराचा लाभ घेतला. शिबिरात ड्राय कपिंग, वेट कपिंग, मोक्सा कपिंग, फंक्शनल कपिंग, मसाज कपिंग आदी विविध प्रकारांची माहिती देऊन प्रत्यक्ष उपचार करण्यात आले. या शिबिरात कपिंग थेरपिस्ट व शारीरिक शिक्षण व क्रीडा संचालक प्रा.प्रीतम ओव्हाळ यांनी सहभागी कर्मचाऱ्यांचे निदान व उपचार केले. हे कार्यक्रमाचे आयोजन महाविद्यालयाचे कर्मचारी कल्याण विभागाच्या प्रमुख डॉ. सुवर्णा खोडदे व शारीरिक शिक्षण व क्रीडा विभागाच्या वतीने करण्यात आले होते. यावेळी डॉ. सचिनकुमार शाह, डॉ. उल्हास लंगोटे, डॉ. अण्णासाहेब निंबाळकर, प्रा. प्रशांत शिंदे, प्रा.संदीप व्यास आदी मान्यवर उपस्थित होते.