सासवड येथे वाहन-चालक परवाना शिबिर

सासवड शहर, ता. १४ : प्रादेशिक परिवहन अधिकारी अर्चना गायकवाड, उपप्रादेशिक परिवहन अधिकारी स्वप्नील भोसले व सहायक प्रादेशिक परिवहन अधिकारी युवराज पाटील यांच्या मार्गदर्शनाखाली, चैतन्य बहुउद्देशीय कृषी संस्था महाराष्ट्र राज्य संस्थेचे अध्यक्ष प्रकाश भालेराव, संचालक हरिभाऊ कुदळे व पुरंदर तालुका मोटर ड्रायव्हिंग स्कूल असोसिएशन यांच्या वतीने शुक्रवारी (ता. १२) सप्टेंबर रोजी सासवड येथे वाहनचालक परवाना शिबिराचे आयोजन करण्यात आले.
या वेळी मोटार वाहन निरीक्षक कृष्णात बामणीकर, सहाय्यक मोटार वाहन निरीक्षक प्रियांका गडेकर व सरला सूर्यवंशी यांनी उपस्थित अर्जदारांना रस्ता सुरक्षा जनजागृती केली. ‘राह वीर’ (Good Samaritan) योजनेविषयी माहिती देत, या योजनेतील पुरस्कार रक्कम ५००० वरून २५००० पर्यंत वाढविल्याचे सांगण्यात आले.
अपघातानंतरच्या ‘गोल्डन अवर’ मध्ये मदतीचे महत्त्व, वाहतूक नियमांचे पालन, हेल्मेट व सीटबेल्टचा वापर, मोबाईलवर बोलत वाहन न चालविणे तसेच मद्यप्राशन करून वाहन न चालविण्याचे आवाहन केले. या वेळी पुरंदर परिसरातील मोटार मालक, चालक व नागरिक उपस्थित होते.