दिवे - सोनोरी गावांनी जपली परंपरा

गराडे, ता. ४ : दिवे (ता. पुरंदर) गावचे ग्रामदैवत श्री कातोबानाथ व सोनोरी गावचे ग्रामदैवत श्री भैरवनाथ यांच्या पालख्यांची एकत्र सीमोल्लंघनाची शेकडो वर्षाची परंपरा पार पडली. शुक्रवारी (ता. ३) दुपारी दोन वाजता पालख्यांचे प्रस्थान झाले.
ठिकठिकाणी महिलांनी पालखी मार्गावर रांगोळी काढून पालखीचे स्वागत करत खांदेकऱ्यांचे पूजन केले. ग्रामस्थांनी पालखी सोहळ्यावर पुष्पवृष्टी केली. टिळेकरमळा येथे किरण टिळेकर, नितीन टिळेकर, चंद्रकांत टिळेकर यांच्या वतीने फटाक्यांची आतषबाजी करत पालखीचे स्वागत करण्यात आले. पालखी सोहळा शिवेवर पोहोचल्यावर गावचे पोलिस पाटील बाळासाहेब झेंडे व दिगंबर दिवेकर यांनी आपट्याची पूजा केली व सोने लुटण्यासाठी एकच झुंबड उडाली.
शिवेवर दिवे व सोनोरीच्या पालख्यांची भेट झाली, हा अविस्मरणीय क्षण पाहण्यासाठी पंचक्रोशीतील शेकडो नागरिकांनी गर्दी केली होती. यावेळी ग्रामस्थांनी दोन्ही पालख्यांवर मुक्तपणे सोन्याची म्हणजेच आपट्याच्या पानाची उधळण केली. यावेळी पारंपरिक तलवारबाजीचा खेळ खेळण्यात आला. दोन्ही पालख्या रात्री छबिन्याने वाजत गाजत मंदिरात विसावल्या.