आंबळे येथे कुक्कुटपालन प्रशिक्षण

गराडे, ता. २ : आंबळे (ता. पुरंदर) येथील उमेद महाराष्ट्र राज्य ग्रामीण जीवनोन्नती अभियानांतर्गत स्वयंसहाय्यता समूहातील ३५ महिलांना बँक ऑफ बडोदा ग्रामीण स्वयंरोजगार प्रशिक्षण संस्था थेऊर, यांच्या मार्फत कृषी उद्यमी कुक्कुटपालन व पशुपालन याविषयी १३ दिवसीय प्रशिक्षण देण्यात आले.
ग्रामीण भागातील महिलांना शेतीपूरक व्यवसायासंदर्भात कौशल्य विकास प्रशिक्षण दिल्याने महिलांचे कौशल्य ज्ञान वाढ होऊन शेतीला जोडधंदा म्हणून कुक्कुटपालन पशुपालन केल्याने आर्थिक उत्पन्नात वाढ होण्यास मदत होत आहे. सदर प्रशिक्षणाला पंचायत समिती पुरंदरमधील तालुका अभियान व्यवस्थापक नंदा कुर्डे, तालुका व्यवस्थापक गणेश कीकले, महांतविर घाडगे, प्रभाग समन्वयक रमेश भंडलकर यांनी भेट देऊन महिलांना मार्गदर्शन केले. यावेळी बँक ऑफ बडोदा आरएसईटीआय थेऊरचे प्रशिक्षक मंगेश माने, ग्रामपंचायत आंबळे येथील सीआरपी पल्लवी दरेकर, ग्रामविकास अधिकारी वडवले भाऊसाहेब, उपसरपंच अजित जगताप, सचिन दरेकर, गौरी कुंजीर आदी उपस्थित होते..