वाढदिवसाला न बोलावल्याने घरच पेटवले

गुनाट, ता. ५ : वाढदिवसाला बोलावले नाही, या रागातून निमोणे (ता. शिरूर) येथील ज्ञानदेव चंदर काळे या शेतकऱ्याचे घर माथेफिरू तरुणाने पेटवून दिले. या आगीत काळे यांचे घर पूर्णतः बेचिराख झाले असून, रोख पैसे, दागिने, कपडे, असे सुमारे दोन लाखांचे नुकसान झाले आहे. आगीत संपूर्ण घरच नष्ट झाल्याने हे कुटुंब उघड्यावर आले आहे.
या संदर्भात निखिल ज्ञानदेव काळे (रा. निमोणे, भोसवस्ती) याने अक्षय संतोष वाळुंज (रा. शिंदोडी, ता. शिरूर) या तरुणाविरोधात या संदर्भात शिरूर पोलीस ठाण्यात तक्रार दिली आहे.‌ पोलिसांनी दिलेल्या माहितीनुसार, निखिल काळे याच्या वाढदिवसाला अक्षय वाळुंज या तरुणाला बोलावले नाही. त्यावरून त्यांच्यात चार दिवसांपूर्वी बाचाबाची झाली. याचाच राग अक्षय याच्या मनात होता. त्यातून अक्षय याने रविवारी (ता. ४) पहाटे तीन वाजता निखिल यांच्या झोपडीवजा घरावर पेट्रोल टाकून पेटवून दिले. सुदैवाने आगीच्या उजेडाने वेळीच जागे झालेल्या काळे कुटुंबीयांनी घराबाहेर पळ काढल्याने त्यांचा जीव वाचला. दरम्यान, घटनेनंतर अक्षय वाळुंज फरारी झाला असून, पोलिस त्याच्या शोधावर आहेत.
यासंदर्भात पोलिस निरीक्षक संदेश केंजळे यांच्या मार्गदर्शनाखाली पोलिस सहायक निरीक्षक गोविंद खटिंग अधिक तपास करत आहेत.

सीसीटीव्ही ठरला दिशादर्शक
आग कोणी व का लावली, हे शोधण्यासाठी संशयावरून या परीसरातील सीसीटीव्ही तपासण्यात आले. या सीसीटीव्ही फुटेजमध्ये अक्षय हा त्याच्या मोटारसायकल वरून फिरत असल्याचे निष्पन्न झाले. वाढदिवसाला बोलावले नाही म्हणून अक्षय याचा निखिल याच्यावर राग होता. त्याचा बदला घेण्याची भाषा तो वारंवार करत होता.

ग्रामस्थांकडुन माणुसकीचे दर्शन
या आगीत काळे यांचा संपुर्ण संसारच उद्ध्वस्त झाल्याने त्यांच्या मदतीसाठी निमोणे येथील ग्रामस्थांनी पुढाकार घेत लोकवर्गणी जमा करत त्यांना आर्थिक व मानसिक पाठबळ देत माणुसकीचे दर्शन घडवले.