आंतरराष्ट्रीय बेसबॉलसाठी इंदापूरच्या अक्षयचा भारतीय संघात समावेश

इंदापूर, ता. १७ : इराण येथे होणाऱ्या 16 व्या आंतरराष्ट्रीय बेस्ट एशिया बेसबॉल कप 2025 स्पर्धेसाठी इंदापूर येथील अक्षय बाळासाहेब मोरे या खेळाडूचा भारतीय संघात समावेश करण्यात आला आहे. त्याच्या या निवडीबद्दल सर्व स्तरातून त्याचे अभिनंदन होत आहे.
वर्ल्ड बेसबॉल सॉफ्ट बॉल कॉन्फेडरेशन, बेसबॉल फेडरेशन ऑफ एशिया आणि इराण बेसबॉल फेडरेशनच्या यांच्यावतीने इराण देशातील कराज येथे सोळाव्या आंतरराष्ट्रीय वेस्ट एशिया बेसबॉल कप २०२५ स्पर्धा आयोजित केले आहे. या स्पर्धेसाठी भारतीय बेसबॉल संघात इंदापूर येथील अक्षय बाळासाहेब मोरे याची निवड झाली असून तो या स्पर्धेसाठी इराण येथे रवाना झाला. भारतीय बेसबॉल संघामध्ये निवड झालेला तो इंदापूर तालुक्यातील पहिला व एकमेव खेळाडू आहे. या स्पर्धेमध्ये भारत, पाकिस्तान, श्रीलंका, इराण, बांगला देश, पॅलेस्टाईन तसेच अफगाणिस्तान या ७ देशांनी सहभाग नोंदवला आहे. अक्षय हा इंदापूर तालुक्यातील माळवाडी नंबर दोन येथील कृषिनिष्ठ, प्रतिष्ठित व राजकीय वलय लाभलेल्या मोरे कुटुंबातील असून त्याला विक्रम गलांडे, विष्णू काळेल, राकेशकुमार यांचे मार्गदर्शन लाभले. अक्षय हा इंदापूर अर्बन बँकेचे माजी अध्यक्ष बाळासाहेब मोरे यांचा चिरंजीव आहे. त्याने अनेक राष्ट्रीय, आंतरराष्ट्रीय स्पर्धेत लक्षवेधी कामगिरी केली आहे. दरम्यान त्याच्या या निवडीबद्दल राज्याचे माजी सहकार व संसदीय कार्यमंत्री हर्षवर्धन पाटील यांच्यासह ॲमॅच्यूयर बेसबॉल फेडरेशन ऑफ इंडिया, महाराष्ट्र बेसबॉल असोसिएशन तसेच अक्षय मोरे मित्र परिवाराच्यावतीने त्याचे अभिनंदन करून पुढील स्पर्धेसाठी शुभेच्छा दिल्या.