इंदापूर पोलिस ठाण्यातील पोलिसांची पावसामुळे तारांबळ

इंदापूर, ता.२६ : इंदापूर पोलिस ठाण्याच्या कार्यालयात पावसामुळे पाण्याने शिरकाव केला. इमारत जुनी असल्याने अनेक ठिकाणी छतातून पाणी टिपकत आहे. तसेच पावसाने अधिकारी तसेच कर्मचारी यांची चांगलीच तारांबळ उडाली. कर्मचाऱ्यांना कामकाजात अडचणी असून, नागरिकांची गैरसोय होत आहे.
इंदापूर तालुक्यात नागरिकांच्या सुरक्षेसह कायदा व सुव्यवस्थेसाठी इंदापूर, वालचंदनगर आणि भिगवन येथे मुख्य पोलिस कार्यालये अस्तित्वात आहे. वालचंदनगर येथे भव्य इमारत आहे. मात्र, तालुक्याचे मुख्य ठिकाण असलेल्या आणि इंदापूर शहरासह बावडा, निमगाव केतकी, पळसदेव, पडस्थळ आणि हिंगणगाव या बीटच्या माध्यमातून जवळपास ७० गावांचे कामकाज चालत असलेल्या इंदापूर तालुका पोलिस ठाण्यास मात्र जुनीच इमारत असून या इमारतीची दुरवस्था झाली आहे यामध्येच कामकाज सुरू आहे.
कर्मचाऱ्यांना ओल्या फाईल्स, भिजलेल्या फरशा आणि विद्युत उपकरणांच्या सुरक्षिततेचा धोका यांचा सामना करावा लागत आहे. सद्या पावस थांबण्याचे नाव घेत नसल्याने पोलिस कर्मचाऱ्यांच्या समस्या अधिकच गंभीर बनत असून यामुळे नागरिकांच्या तक्रारींचे निवारण आणि इतर दैनंदिन कामकाजात अडथळा निर्माण झाला आहे.
इंदापूर पोलिस ठाण्यासाठी प्रशस्त जागा उपलब्ध असून राज्याचे मुख्यमंत्री तथा गृहमंत्री देवेंद्र फडणवीस तसेच जिल्ह्याचे पालकमंत्री अजित पवार व राज्याचे क्रीडा व युवक कल्याण मंत्री दत्तात्रेय भरणे यांनी याप्रकरणी लक्ष घालून तालुका पोलिस ठाण्यासाठी भव्य इमारत मंजूर करावी, अशी मागणी पोलिसांसह नागरिक करीत आहेत.

पोलिस अधीक्षकांच्या भूमिकेकडे लक्ष
मागील आठवड्यात जिल्ह्याचा पदभार स्वीकारलेले पोलिस अधीक्षक संदीप सिंह गिल यांनी इंदापूर पोलिस ठाण्याला भेट दिली. यावेळी इमारतीच्या प्रश्नाबाबत गिल यांनी माहिती घेऊन पुढील कार्यवाही केली जाईल असे सांगितले. होते त्यातच आता पावसाळा सुरू झाल्याने पोलिस अधीक्षक यांनी या प्रश्न लक्ष घालून तालुका पोलिस ठाण्यासाठी नवीन भव्य व प्रशस्त इमारत मंजुरीसाठी पाठपुरावा करण्याची गरज व्यक्त केली जात आहे.