गैरव्यवहार झाकण्यासाठी अधिकाऱ्यांकडून क्लृप्त्या

संतोष आटोळे : सकाळ वृत्तसेवा
इंदापूर, ता. २१ : इंदापूर शहरातील महत्त्वाच्या चौकांचे सार्वजनिक बांधकाम विभागाच्या माध्यमातून सुशोभीकरण करण्यात आले. यासाठी कोट्यवधी रुपये खर्च करण्यात आला. त्यामुळे ही कामे पाच- सहा वर्षे तरी टिकणे अपेक्षित असताना दोन वर्षातच सदर कामे भुईसपाट होत चालली आहेत. या पार्श्वभूमीवर ‘सकाळ’ने प्रसिद्ध केलेल्या सचित्र वृत्तमालिकेच्या पार्श्वभूमीवर सार्वजनिक बांधकाम विभागाकडून सदर निकृष्ट कामे नगरपालिकेच्या माथी मारण्याचा प्रयत्न सुरू आहे. मात्र, कामेच दर्जेदार न झाल्याने देखभाल दुरुस्तीचा प्रश्न दूरच राहतो, अशी भावना नागरिकांमधून व्यक्त केली जात आहे.
मुख्यमंत्री देवेंद्र फडणवीस यांचे कुलदैवत असलेल्या इंदापूर तालुक्यातील श्री क्षेत्र नीरा नरसिंहपूर तीर्थक्षेत्र विकास आराखड्यामधून उपमुख्यमंत्री अजित पवार आणि क्रीडामंत्री दत्तात्रेय भरणे यांच्या प्रयत्नातून व सार्वजनिक बांधकाम विभागाच्या माध्यमातून इंदापूर शहरातील महत्त्वाच्या चौकांचे सुशोभीकरण करण्यात आले. यामध्ये खुळे चौक सुशोभिकरणामध्ये सिंहाचे शिल्प, तापी चौक सुशोभिकरणामध्ये परीचे शिल्प, अकलूज-बारामती चौक सुशोभिकरणामध्ये विठ्ठलाची मूर्ती, १०० फुटी मार्गावरील चौक सुशोभिकरणामध्ये शेतातील पिकांचे शिल्प, टेंभुर्णी चौक सुशोभिकरणामध्ये डाळिंब शिल्प, शहराच्या बाह्यवळण मार्गावरील मालोजी राजे चौक सुशोभीकरण येथे मालोजीराजांचे शिल्प व महात्मा फुले चौक सुशोभीकरण करीत बगळ्यांचे शिल्प करणे, असे शहरातील सात चौकांच्या सौंदर्यकरण व सुशोभीकरणासाठी एकूण १ कोटी ६८ लाख २७ हजार रुपयांचा निधी खर्च केला.
ही कामे करत असताना सार्वजनिक बांधकाम विभागाच्या अधिकाऱ्यांनी योग्य नियोजन व कामाच्या दर्जाकडे लक्ष देणे आवश्यक होते. मात्र, याबाबत निष्काळजीपणा केल्याने दोन- तीन वर्षातच सदर कामे ही फक्त अधिकारी व ठेकेदाराच्या आर्थिक लाभासाठीच होती का? असे चित्र पाहायला मिळत आहे.
याबाबत ‘सकाळ’ने प्रत्येक चौकातील सुशोभीकरणातील कामाचा दर्जा व नियोजनाचा अभाव यांची सचित्र वस्तुस्थिती प्रसिद्ध केली. त्यानंतर सदर कामे पूर्ण करून इंदापूर नगरपालिकेकडे हस्तांतरित केल्याचा दावा केला आहे. मात्र, नगरपालिकेकडे कामे हस्तांतर करत असताना संबंधित कामे पूर्णत्वाचा दाखला, तसेच ठेकेदाराकडून करून घ्यायच्या देखभाल दुरुस्तीचा कालावधी या संदर्भातील संपूर्ण माहिती नगरपरिषदेस लेखी देण्यात आली नाही. आता मात्र कामे दर्जेदार न झाल्याने मुदतीपूर्वीच भुईसपाट होत चालली आहे. यामुळे देखभाल दुरुस्तीचा प्रश्न दूर राहतो.

वृत्तमालिकेची वरिष्ठ पातळीवर दखल
इंदापूर शहरातील चौक सुशोभीकरण कामातील अनियमिततेबाबत ‘सकाळ’ने वृत्तमालिका प्रसिद्ध केल्यानंतर तक्रारीची दखल उपमुख्यमंत्री अजित पवार यांच्या कार्यालयाकडून घेत याबाबत उचित कार्यवाही करावी, अशी सूचना अपर मुख्य सचिव, सार्वजनिक बांधकाम विभाग, मंत्रालय, मुंबई यांच्याकडे केली आहे. या वृत्तमालिकेची दखल वरिष्ठ पातळीवरून घेण्यात आल्याने या सर्वच कामांची चौकशी केली जाणार आहे.

इंदापूर शहरातील चौकांच्या सुशोभीकरण कामात हलगर्जीपणा केला गेला असेल तर संबंधित अधिकारी व ठेकेदारांवर कारवाई करू. चुकीचे काम करणाऱ्यांना पाठीशी घालणार नाही.
- दत्तात्रेय भरणे, क्रीडा मंत्री