इंदापूर मोहरमनिमित्त घडले हिंदू मुस्लिम ऐक्याचे दर्शन

इंदापूर, ता. ७ : शहरात मोहरम सणानिमित्त ताबूत व पंजाची पारंपरिक पद्धतीने मिरवणूक झाली. यावेळी जागोजागी हिंदू-मुस्लिम ऐक्याचे दर्शन झाले.
इंदापूर शहरात मोहरम सणानिमित्त पारंपरिक पद्धतीनुसार चार ताबूत बसतात आणि सर्व विभागातील ४२ सवाऱ्या (पंजे) असतात. सर्व धर्मीय बांधव त्यामधे एकत्र येतात. हिंदू-मुस्लिम धर्माच्या लोकांच्या मानाच्या या सवाऱ्या असतात. मोहरमनिमित्त सर्व सवाऱ्यांची गावात मिरवणूक होते. सवारी निघण्याचा पहिला मान हा ठाकर गल्ली, त्यानंतर सातपुडा बागवान गल्ली, कुरेशी मोहल्ला, कसबा आणि शेवटी शेख मोहल्ला अशा विविध भागांना असतो. या सवाऱ्यांच्या दर्शनासाठी सर्व धर्मातील भाविकांनी गर्दी केली होती.
सवारी मिरवणुकीची सांगता झाल्यानंतर संध्याकाळी ताबुताची मिरवणूक झाली. यामध्ये बागवान जमात ताबूत व नंतर शेख मोहल्ला व कसबा मोहल्ला या दोन महत्त्वाच्या ताबुतांची नेहरू चौक येथे डावी उजवी झाल्यानंतर मुख्य मिरवणुकीस प्रारंभ झाला. यादरम्यान, गळा भेटीचा प्रसंग डोळ्यात टिपण्यासाठी मोठी गर्दी झाली होती. शिवाजी चौक येथे फातेहखानी होऊन मिरवणुकीची सांगता झाली. त्यानंतर दोन्ही ताबूत वेगवेगळ्या मार्गाने मार्गस्थ झाले. इंदापूर नगर परिषदेचे मुख्य अधिकारी रमेश ढगे यांनी प्रशासनाच्या वतीने फुलांची चादर अर्पण केली. यावेळी इंदापूर पोलिस ठाण्याच्या वतीने शहरात चोख बंदोबस्त ठेवण्यात आला होता.