मालोजीराजे गढीवरील झाडांचे होणार संवर्धन

इंदापूर, ता. ८ ः शहरातील ऐतिहासिक मालोजीराजे गढी व हजरत चांदशहावलीबाबा दर्गा परिसरात गढी संवर्धन व दर्गा सुशोभीकरण काम सुरू आहे. यामध्ये गढीवर चित्रबलाक व वटवाघळे यांची निवासस्थाने असलेली ऐतिहासिक चिंचेची झाडे याबाबत कोणतीही खबरदारी न घेतल्याने त्यांची निवारास्थाने धोक्यात आले बाबत ‘सकाळ’ने वृत्त प्रसिद्ध केले होते. याची दखल घेत झाडांच्या संवर्धनासाठी उपाययोजना सुरू केल्याने पर्यावरण, तसेच पक्षी प्रेमींनी समाधान व्यक्त करीत ‘सकाळ’चे अभिनंदन केले आहे.
याबाबत अधिक माहिती अशी की, राज्याचे उपमुख्यमंत्री अजित पवार व क्रीडामंत्री दत्तात्रेय भरणे यांच्या प्रयत्नातून शहरातील छत्रपती शिवाजी महाराज यांचे आजोबा वीरश्री मालोजीराजे गढी संवर्धन व लगत असलेल्या हजरत चांदशाहवली बाबा दर्गा सुशोभीकरण काम सुरू आहे. मात्र, हे विकास काम करीत असताना या गढीवर असलेल्या ऐतिहासिक चिंचेच्या झाडांबाबत कोणत्याही स्वरूपाची नोंद अथवा झाडे संवर्धनाबाबत उपाययोजना करण्यात आल्या नसल्याने या झाडांसह त्यावर राहणारे वटवाघळे, चित्रबलाक पक्षी यांचे निवासस्थान धोक्यात आले होते.
याबाबत ‘सकाळ’ने वृत्त प्रसिद्ध केले होते. याची दखल घेत झाडांच्या भोवती संरक्षक कट्टे उभे करीत झाडांचे संरक्षक करण्याचे काम सुरू केले आहे. यामुळे वृक्ष प्रेमी व पक्षी प्रेमींमधून समाधान व्यक्त केले जात आहे.

मालोजीराजे गढीवरील ऐतिहासिक झाडांमुळे गढीच्या वैभवात भर पडत असताना या झाडांच्या संवर्धनाकडे दुर्लक्ष केले जात असल्याबाबत ‘सकाळ’ने वृत्त प्रसिद्ध करीत प्रशासनाचे लक्ष वेधले. याबाबत पाठपुरावा केल्याने झाडांचे संवर्धन करण्यासाठी प्रशासनाकडून कार्यवाही सुरू झाल्याने ‘सकाळ’चे अभिनंदन करतो.
-ॲड. आशुतोष भोसले, सामाजिक कार्यकर्ते.

वटवाघळे ही निसर्ग साखळीचा महत्त्वाचा भाग आहेत. त्यांचे इंदापूर शहरातील निवारास्थान सुरक्षित राहणे गरजेचे होते. तसेच दरवर्षीप्रमाणे कच्छच्या रणातून इंदापूर येथे चित्रबलाक या सैबेरियन पक्ष्यांचे आगमन होत असते. ते याच झाडांवर आपला मुक्काम करतात. यामुळे ही झाडे वाचणे गरजेचे होते. याबाबत ‘सकाळ’ने वृत्त प्रसिद्ध करीत पाठपुरावा केल्याने कार्यवाही झाली. याचे समाधान वाटत आहे.
डॉ. महेश गायकवाड, पक्षी अभ्यासक.