इंदापुरात मांज्यामुळे शिक्षकाच्या बोटाला इजा

इंदापूर, ता. ८ ः शहरातील पुणे- सोलापूर महामार्गावर तुळजाभवानी मंदिराच्या परिसरात मंगळवारी (ता. ८) सायंकाळी दुचाकीवर निघालेल्या शिक्षकाच्या हाताला रस्त्यात आडव्या असलेल्या नायलॉन मांज्यामुळे गंभीर इजा झाली आहे. सुदैवाने मांजा हाताने अडवल्याने तो गळ्याला कापला नाही, अन्यथा मोठा अनर्थ घडला असता.
याबाबत अधिक माहिती अशी की, शहरातील समर्थ व्यायाम मंडळ संचलित मूकबधिर मुलांच्या शाळेतील शिक्षक शिवाजी शेळवणे हे आपल्या मुलासह दुचाकीवर पुणे- सोलापूर मार्गावरून आपल्या घरातून बस स्थानकाकडे येत असताना तुळजाभवानी देवीच्या मंदिर परिसरात आल्यानंतर रस्त्याच्यामध्ये लोमकळत असलेला नायलॉन मांजा अचानक गळ्याच्या जवळ आला. यावेळी प्रसंगावधान राखत शेळवणे यांनी हात आडवा लावल्याने बोटाला गंभीर इजा झाली. मात्र, गळा वाचला अन्यथा मोठा अनर्थ घडला असता.
दरम्यान, दरवर्षीप्रमाणे सणाच्या निमित्ताने अनेक तरुण पतंग उडवण्याचा आनंद घेत असताना नायलॉन किंवा चिनी मांज्यांचा वापर मोठ्या प्रमाणात होत आहे. यामुळे अपघाताच्या घटना वाढत असून, नागरिकांमध्ये भीतीचे वातावरण आहे. विशेषतः दुचाकीस्वार व पादचाऱ्यांना या मांज्याचा मोठा धोका आहे. यामुळे याबाबत पोलिस प्रशासनाने ठोस कारवाई करून नायलॉन मांजा विक्रीवर बंदी आणत विक्री करणाऱ्यांवर कारवाई करण्याची मागणी होत आहे.

चिनी मांजा, नायलॉन मांजा यांच्यावर बंदी आहे. कोणी असे मांजे विकताना वा वापरताना आढळल्यास त्यांच्यावर कडक कायदेशीर कारवाई करण्यात येईल. तसेच नागरिकांनी ही काळजी घ्यावी.
- सूर्यकांत कोकणे, पोलिस निरीक्षक.