इंदापुरात पोलिस पाटलाकडून ग्रामसेवकाला मारहाण

इंदापूर, ता. १५ : इंदापूर पंचायत समितीच्या आवारात तावशी (ता. इंदापूर) येथे कार्यरत असलेल्या ग्रामसेवकास अतिवृष्टी नुकसानग्रस्ताच्या यादीत नाव न टाकल्याने पोलिस पाटलाने मारहाण झाल्याची घटना घडली आहे. याप्रकरणी इंदापूर पोलिस ठाण्यात सागर भारत खरात याच्याविरोधात गुन्हा दाखल झाला आहे.
याबाबत सतीश रघुनाथ गायकवाड (वय- ५२, व्यवसाय- ग्रामपंचायत अधिकारी तावशी, रा. काटेवाडी ता. बारामती) यांनी दिलेल्या फिर्यादीनुसार सोमवारी (ता. १४) दुपारी पंचायत समिती कार्यालयाच्या आवारातील सभापती चेंबर समोरील परिसरात फिर्यादी हे त्यांचे सरकारी कर्तव्य करीत होते. त्यावेळी आरोपी सागर भारत खरात (पोलिस पाटील, रा. तावशी, ता. इंदापूर) याने अतिवृष्टी नुकसानग्रस्ताच्या यादीत त्याचे नाव समाविष्ट करण्यावरून फिर्यादीशी वाद घालत त्यांच्या सरकारी कामात अडथळा आणला. तसेच फिर्यादीस शिवीगाळ व दमदाटी करून मारहाण करीत त्यांच्या हातातील अतिवृष्टी नुकसान भरपाईची यादी, घरकुलाचे प्रस्ताव फेकून दिले. यावरून इंदापूर पोलिस ठाण्यात खरात याच्याविरोधात गुन्हा दाखल करण्यात आला आहे. या घटनेचा पुढील तपास पोलिस निरीक्षक सूर्यकांत कोकणे यांच्या मार्गदर्शनाखाली सहाय्यक पोलिस निरीक्षक स्मिता पाटील करीत आहेत.