इंदापूरमध्ये कनिष्ठ सहाय्यकास जीवे मारण्याची धमकी

इंदापूर, ता. १५ : ‘घरकुलाचे पैसे का आले नाहीत’, अशी विचारणा केल्यानंतर यादीत नाव नसल्यामुळे निधी देता आला नाही, चालू वर्षाच्या प्रस्तावात जिल्हाधिकारी कार्यालयाकडून मंजूर होऊन आल्यानंतर पैसे येतील, असे उत्तर दिल्याने इंदापूर पंचायत समितीतील कनिष्ठ सहाय्यक यांना दमदाटी करीत जीवे मारण्याची धमकी देण्यात आली. या प्रकरणी इंदापूर पोलिस ठाण्यात दोघांविरोधात गुन्हा दाखल झाला आहे.
याबाबत वैभव नाळे यांनी दिलेल्या फिर्यादीनुसार शनिदेव कैलास बंडगर व सदाशिव बाबू सुळ (रा.गोंदि ता.इंदापूर) यांच्याविरोधात गुन्हा दाखल झाला आहे. सोमवारी (ता.१४) दुपारी इंदापूर पंचायत समिती कार्यालयात फिर्यादी हे पुण्यश्लोक अहिल्यादेवी घरकुल योजनेचे काम करीत होते. त्याचवेळी बंडगर व सुळ हे गटविकास अधिकारी सचिन खुडे यांच्या कार्यालयात येत त्यांना ‘घरकुलाचे पैसे आले का’, अशी विचारणा केली. त्यावेळी खुडे यांनी नाळे यांना बोलावून घेत त्याबाबत विचारणा केली. त्यावर १८ जुलै २०२४ च्या शासन निर्णयाने मंजूर घरकुल यादीत दोघांचे नाव नाही. घरकुल रक्कम वितरणाच्या यादीही त्यांचे नाव नसल्याने निधी देता आला नाही. चालू वर्षीच्या प्राप्त प्रस्तावाच्या पात्र घरकुल यादीमध्ये यांची नावे आहेत. ते जिल्हाधिकारी कार्यालय येथून मंजूर होऊन आल्यानंतर बंडगर व सुळ यांचे पैसे येतील’, असे नाळे यांनी सांगितले. त्याचा राग आल्याने बंडगर याने ‘हा ठराविक लोकांचे काम करतो’, असे म्हणत कनिष्ठ सहाय्यक नाळे यांना धमकी दिली. रेकॉर्ड रूममध्ये डाटा एन्ट्री ऑपरेटर वेंकटेश श्याम जगताप यांना कागदपत्रे दाखवत असताना दोघा आरोपींनी कागदपत्रे अस्ताव्यस्त फेकून दिली. या प्रकरणाचा पुढील तपास इंदापूर पोलिस करीत आहेत.
-