एक लाख रुपयांच्या केबलची चोरी

इंदापूर, ता. १८ ः बळपुडी (ता. इंदापूर) येथील आवादा क्लीन प्रोजेक्ट कंपनीच्या सौरऊर्जा प्रकल्पांमधून सुमारे एक लाख रुपये किमतीची साडेसहा हजार मीटर केबल चोरीला गेल्याची घटना घडली आहे. याप्रकरणी इंदापूर पोलिस ठाण्यात अज्ञाताविरोधात गुन्हा दाखल केला आहे. याबाबत विकास केरबा कळके (वय ४२, व्यवसाय सुरक्षा रक्षक व्यवस्थापक, रा. कात्रज- दत्तनगर रस्ता, तिरंगा चौक, पुणे) यांनी दिलेल्या फिर्यादीनुसार सोमवारी (ता. १४) मध्यरात्री इंदापूर तालुक्यातील बळपुडी गावच्या हद्दीत गायरानातील सौरऊर्जा प्रकल्पाचे आवादा क्लीन प्रोजेक्ट कंपनीच्या कामाच्या ठिकाणावरून ४ स्क्वेअर एमएमची काळी आणि लाल रंगाची सहा हजार ८५२ मीटर व ७० स्क्वेअर एमएमची हिरव्या रंगाची ४ मीटर इनव्हटर केबल असा एकूण एक लाख रुपये किमतीचा मुद्देमाल चोरीस गेला. या प्रकरणाचा पुढील तपास पोलिस निरीक्षक सूर्यकांत कोकणे यांच्या मार्गदर्शनाखाली पोलिस हवालदार गोफणे करत आहेत.