अतिवृष्टीने नुकसान ग्रस्तांना तातडीने अनुदान द्या

इंदापूर, ता. २२ ः तालुक्यात सन २०१९- २० मध्ये झालेल्या अतिवृष्टीमुळे मोठ्या प्रमाणावर नुकसान झाले होते. यामध्ये अनेक नुकसानग्रस्त शेतकरी अनुदानापासून वंचित आहेत. त्यांना तत्काळ अनुदान वितरित करावे, अशी मागणी इंदापूर राष्ट्रवादी काँग्रेस शरदचंद्र पवार पक्षाच्या वतीने तहसीलदार यांना निवेदन देऊन केली आहे.
याबाबत राष्ट्रवादी काँग्रेस शरदचंद्र पवार पक्षाच्या सामाजिक व न्याय विभागाचे जिल्हाध्यक्ष सागर मिसाळ यांनी दिलेल्या निवेदनानुसार सन २०१९- २० मधील इंदापूर तालुक्यातील अनेक भागात गारपीट झाली होती. तसेच, त्यावेळी शासनदरबारी पंचनामे झाले होते. संबंधित नुकसानग्रस्त शेतकऱ्यांचे आधार कार्ड, पॅनकार्ड केवायसी केले होते. त्यानुरूप तहसील कार्यालयास अनुदान प्राप्त झाले होते. काहीना अनुदान वितरित केले. मात्र, अनेक पात्र गारपीटग्रस्त नुकसान अनुदानापासून वंचित आहेत. तरी संबंधित अधिकाऱ्यांनी तत्काळ अनुदान वितरण करावे, अशी मागणी करण्यात आली आहे. तसेच याबाबत कार्यवाही न झाल्यास आंदोलन करण्याचाही इशारा देण्यात आला आहे. या निवेदनावर सागर मिसाळ यांच्यासह संजय शिंदे, अक्षय कोकाटे, सागर घाडगे, विकास खिलारे, समीर शेख, संजय मातपूरकर, माऊली घोरपडे यांचेसह अन्य पदाधिकारी यांच्या स्वाक्षऱ्या आहेत.

सन २०१९- २० मध्ये इंदापूर तालुक्यामध्ये झालेल्या नैसर्गिक आपत्तीमुळे बाधित व्यक्तींना अनुदान वितरित करण्यात आलेले होते. मात्र, काही बाधीतग्रस्तांचे बँक खाते क्रमांक अथवा आयएफसी कोड चुकीचे असल्याने त्यांचे अनुदान परत आलेले होते. अशा बाधितग्रस्तांची यादी करण्याचे काम सुरू असून, शिल्लक बाधितग्रस्तांना साधारणतः ८ दिवसात अनुदान वितरित करण्याची प्रक्रिया पूर्ण करण्यात येईल.
- जीवन बनसोडे, तहसीलदार, इंदापूर