दुचाकीस्वाराला अडवून नपेद्वारे ४८ हजारांची लूट

इंदापूर, ता.२३ : पुणे सोलापूर राष्ट्रीय महामार्गावर पळसदेव (ता. इंदापूर) येथे दुचाकीवरून निघालेल्या व्यक्तीला चारचाकीतून आलेल्या दोन पुरुष व दोन महिलांनी अडविले व मोटारीत घेत मारहाण करून फोन पेद्वारे ४८ हजार पाचशे रुपयांची बळजबरीने हस्तांतरित करीत लूट केली. ही घटना मंगळवारी (ता.२२) घडली.
लुटीप्रकरणी इंदापूर पोलिस ठाण्यात चौघांच्या विरोधात गुन्हा दाखल करण्यात आला आहे. याबाबत बाळासाहेब हरिश्चंद्र चंबरे (वय ४२, व्यवसाय मासेमारी,रा.चांडगाव, ता. इंदापूर) यांनी दिलेल्या फिर्यादीनुसार, पळसदेव गावाच्या हद्दीत तोंडेवस्ती परिसरात, पुणे-सोलापूर हायवे लगत असलेल्या एका हॉटेलसमोरून फिर्यादी दुचाकीवरून (क्रमांक MH-४२-BL-८६७९) जात होता. त्यावेळी पाठीमागून आलेल्या पांढऱ्या रंगाची मोटरी दुचाकीला आडवी लावली. मोटारीतील दोन पुरुष व दोन महिला यांनी फिर्यादीस त्यांच्या मोटारीत बळजबरीने मधोमध बसविले व मारहाण केली. फिर्यादीचा मोबाईल हिसकावून घेतला. त्यानंतर मोबाईलमधील फोन पेच्या खात्यावरून वंदना दीपक जाधव या नावाच्या खात्यावर एकूण ४८ हजार ५०० रुपये जबरदस्तीने ट्रान्सफर केले. यानंतर फिर्यादीस कौठळी गावाच्या हद्दीत सोडून देत संबंधित मोबाईलसह आरोपी पसार झाले. यावरून अज्ञात चौघांच्या विरोधात इंदापूर पोलिस स्टेशन येथे गुन्हा दाखल करण्यात आला. याप्रकरणाचा पुढील तपास पोलिस निरीक्षक सूर्यकांत कोकणे यांच्या मार्गदर्शनाखाली सहाय्यक पोलिस निरीक्षक दत्तात्रेय लेंडवे करत आहेत.