आश्रमशाळांना थकीत, चालू अनुदान त्वरित द्या

इंदापूर, ता. २६ ः इतर मागास बहुजनकल्याण विभागांतर्गत सुरू असलेल्या व स्वयंसेवी संस्थांमार्फत चालविण्यात येत असलेल्या शासन मान्यताप्राप्त अनुदानित भटक्या जमातीच्या प्राथमिक, माध्यमिक, उच्च माध्यमिक आश्रमशाळांसाठीचे परिपोषणाचे चालू व मागील वर्षीचे प्रलंबित अनुदान तत्काळ द्या, अशी मागणी मातोश्री रमाबाई आंबेडकर विद्यार्थी वसतिगृह ट्रस्टच्या अध्यक्षा शकुंतला रत्नाकर मखरे यांनी समाजकल्याण विभागाकडे निवेदनाद्वारे केली आहे.
याबाबत देण्यात आलेल्या निवेदनानुसार जून महिन्यामध्ये आश्रमशाळा सुरू होताना ६० टक्के परिपोषण अनुदान देणे गरजेचे आहे. मात्र, जुलै महिना संपत आला तरी अद्याप हे अनुदान मिळालेले नाही. गेल्या वर्षीचेदेखील प्रलंबित परिपोषण अनुदान व दोन वर्षांचे इमारत भाडेदेखील मिळाले नाही, यामुळे आश्रमशाळा चालविणे अवघड बनले आहे.
विद्यार्थ्यांना शासनाच्या योजनांचा लाभ व्हावा, त्यांना दर्जेदार, उत्तम शिक्षण मिळावे, तसेच त्यांच्या निवासाची, भोजनाची उत्तम सोय व्हावी या उदात्त हेतूने प्रेरित होऊन संस्था उत्कृष्टपणे चालवत आहोत. मात्र, संस्थेला अनुदानाअभावी आश्रमशाळा चालवणे कठीण होत आहे. त्यामुळे शासनाने आश्रमशाळांचे थकीत परिपोषण आहाराचे अनुदान व चालू आर्थिक वर्षाच्या सुरुवातीचे ६० टक्के अनुदान, तसेच प्रलंबित दोन वर्षांचे इमारतभाडे त्वरित वितरित करावे, असे नमूद केले आहे.