महसूल दिनानिमित्त इंदापुरात उपक्रम

इंदापूर, ता. ३१ : इंदापूर तालुक्यात एक ऑगस्टपासून सात दिवस महसूल विभागाकडून देण्यात येणाऱ्या सेवा, तसेच योजनांची माहिती आणि प्रत्यक्ष लाभ नागरिकांना मिळावा यासाठी कार्यक्रम घेण्यात येत आहेत. अशी माहिती तहसीलदार जीवन बनसोडे यांनी दिली.
राज्यात १ ऑगस्ट हा दिवस महसूल दिन म्हणून साजरा करण्यात येतो. त्यादिवशी सप्ताहाचा शुभारंभ करण्यात येणार आहे. तर अतिक्रमण नियमानुकूल करण्यास पात्र असलेल्या कुटुंबांना अतिक्रमित जागांचे पट्टे वाटप करण्याबाबत कार्यक्रम, पाणंद, शिवरस्त्यांची मोजणी करून त्यांच्या दुतर्फा झाडे लावणे, छत्रपती शिवाजी महाराज महाराजस्व अभियान राबविणे, विशेष साहाय्य योजनेतील थेट लाभ हस्तांतर, लाभार्थ्यांना घरभेटी करून डीबीटी करून अनुदानाचे वाटप करणे, शासकीय जमिनींवरील अतिक्रमणे निष्कासित करणे, एम-सँड धोरणाची अंमलबजावणी करणे व नवीन मानक कार्यप्रणालीप्रमाणे धोरण पूर्णत्वास नेणे याबाबतचे कार्यक्रम सप्ताहात घेण्यात येत असल्याचे बनसोडे यांनी सांगितले.