अवैधरीत्या वाळू उपशाप्रकरणी गंगावळणमणध्ये एकावर गुन्हा

इंदापूर, ता. ४ ः गंगावळण (ता. इंदापूर) गावच्या हद्दीत उजनी जलाशयातील भीमा नदीच्या पात्रातून अवैधरीत्या वाळू उपसा करून साठा केल्याप्रकरणी एका जणाविरोधात इंदापूर पोलिस ठाण्यात गुन्हा दाखल केला आहे. दत्ता नंदकुमार गलांडे (रा. गंगावळण, ता. इंदापूर) असे गुन्हा दाखल झालेल्या आरोपीचे नाव असून, यामध्ये ४८ हजार रुपयांचा मुद्देमाल जप्त केला आहे.
याबाबत ग्राममहसूल अधिकारी करिष्मा मोहनराव बोबडे यांनी दिलेल्या फिर्यादीनुसार सोमवारी (ता. ४) दुपारी १२ वाजताच्या सुमारास गंगावळण गावच्या हद्दीत भीमा नदीत गलांडे व त्याच्या साथीदारांनी चोरी करण्याच्या उद्देशाने यांत्रिक बोटीच्या साहाय्याने वाळूचा उपसा करून साठवणूक केली. यामध्ये साठा केलेली ४८ हजार रुपये किमतीची प्रति सहा हजार रुपये ब्रास याप्रमाणे आठ ब्रास वाळू जप्त केली आहे. या प्रकरणाचा पुढील तपास पोलिस निरीक्षक सूर्यकांत कोकणे यांच्या मार्गदर्शनाखाली पोलिस उपनिरीक्षक हनुमंत वाघमारे करीत आहेत.