जिल्हाधिकाऱ्यांसमवेत बैठकीनंतर आंदोलनावर निर्णय

इंदापूर, ता. ५ : पुणे-सोलापूर महामार्गावर हिंगणगाव येथे ११ ऑगस्टला रास्ता रोको आंदोलन करण्याचा इशारा इंदापूर तालुक्यातील सकल हिंदू समाजाने दिला होता. या पार्श्वभूमीवर प्रशासनाचे वरिष्ठ अधिकारी व संघटनेचे पदाधिकारी यांची बैठक इंदापूर पोलिस स्टेशनमध्ये झाली. या वेळी कोणताही तोडगा न निघाल्याने येत्या दोन ते तीन दिवसांत जिल्हाधिकारी यांच्यासमवेत बैठक होऊन आंदोलनाची दिशा ठरवली जाणार असल्याचे संघटनेकडून सांगण्यात आले.
छत्रपती शिवाजी महाराज यांचे आजोबा वीरश्री मालोजीराजे भोसले यांचे इंदापूर येथील ऐतिहासिक समाधिस्थळ व गढीवर झालेले अतिक्रमण काढण्याची मागणी होत आहे. याकडे प्रशासनाचे दुर्लक्ष होत असल्याचा आरोप करत रास्ता रोको आंदोलनाचा इशारा दिला होता. दरम्यान, पोलिस प्रशासनाकडून मंगळवारी (ता. ६) पुणे-सोलापूर महामार्गावर हे आंदोलन न करता इतर सांविधानिक मार्गाने करण्याच्या सूचना नोटीसच्या माध्यमातून दिल्या आहेत. तसेच, अधिकाऱ्यांसमवेत झालेल्या बैठकीत सार्वजनिक बांधकाम विभाग व नगर परिषद यांच्याकडून अतिक्रमणे हटवण्यासंदर्भात आश्‍वासन देण्यात आले. मात्र, सकल हिंदू समाजच्या पदाधिकाऱ्यांचे समाधान न झाल्याने जिल्हाधिकारी यांच्यासमवेत बैठक घेण्यावर एकमत झाले. त्यानुसार यात काय निर्णय होतो, यावर आंदोलनाची दिशा ठरणार आहे. बैठकीस अप्पर पोलिस अधीक्षक गणेश बिरादार, उपविभागीय पोलिस अधिकारी डॉ. सुदर्शन राठोड, तहसीलदार जीवन बनसोडे, मुख्याधिकारी रमेश ढगे, सार्वजनिक बांधकाम विभागाचे उपअभियंता एस.डी.दुबाले, भूमी अभिलेखचे उपअधीक्षक सुशील पवार यांच्यासह सकल हिंदू समाजाचे कार्यकर्ते उपस्थित होते.

‘सकाळ’च्या वृत्तानंतर प्रशासनाला जाग
हिंदू समाजाच्या वतीने रास्ता रोको आंदोलन करण्यासंदर्भात ‘सकाळ’मध्ये वृत्त प्रसिद्ध झाले. यवत येथील घटनेच्या पार्श्वभूमीवर कायदा व सुव्यवस्थेचा प्रश्न निर्माण होऊ नये म्हणून प्रशासनाने दखल घेत बैठक घेतली.