इंदापुरातील निवृत्त पोलिसाला फसवणाऱ्यास २४ तासांत अटक

इंदापूर, ता. ७ : इंदापूर शहरातील बँक ऑफ महाराष्ट्रच्या एटीएममधून एका निवृत्त पोलिस कर्मचाऱ्याची ५० हजार रुपयांची फसवणूक केलेल्या आरोपीस इंदापूर पोलिस ठाण्याच्या गुन्हे शोध पथकाने २४ तासाच्या आत अटक केली.
याबाबत पोलिस निरीक्षक सूर्यकांत कोकणे यांनी माहिती दिली की, ज्ञानदेव सोपान दरेकर (वय ६४, धंदा शेती, सेवानिवृत्त पोलिस कर्मचारी, रा. शेटफळ हवेली, ता. इंदापूर) यांची मंगळवारी (ता. ५) सकाळी साडेनऊ वाजण्याच्या सुमारास बँक ऑफ महाराष्ट्र शाखा इंदापूर येथील एटीएममध्ये खात्यातील शिल्लक रक्कम तपासण्यासाठी गेले होते. त्यावेळी त्यांच्या मागे उभा असलेल्या एका अनोळखी व्यक्तीने त्यांच्या एटीएम कार्डचा पिन पाहिला आणि बॅलन्स दिसत नाही, असे सांगून मदतीच्या बहाण्याने हात चलाखीने एटीएम कार्ड बदलत शहरातीलच दुसऱ्या बँकेच्या एटीएममधून प्रत्येकी १० हजार रुपयांप्रमाणे ५० हजार रुपये काढत फसवणूक केली होती. या प्रकरणी इंदापूर पोलिस ठाण्यात गुन्हा दाखल केला होता.
याबाबत गुन्हे शोध पथकाचे सहाय्यक पोलिस निरीक्षक जीवन मोहिते, स्मिता पाटील, पोलिस हवालदार सलमान खान, अंमलदार गणेश ढेरे, तुषार चव्हाण, अंकुश माने, सूरज गुंजाळ, नंदू जाधव, विनोद लोखंडे, दिनेश चोरमले, योगेश करचे यांच्या पथकाने तांत्रिक माहितीच्या आधारे तपासाची चक्रे फिरवीत २४ तासांच्या आत आरोपी प्रमोद सीताराम यलगर (वय ४८, कांदनवाडी, ता. खटाव, जि. सातारा) याला अटक केली. इंदापूर पोलिसांच्या या कामगिरीचे सर्वत्र कौतुक होत आहे.