उजनी धरण १०० टक्के भरले

इंदापूर ता. ९ : रक्षाबंधन सणाच्या मुहूर्तावर उजनी धरण शनिवारी (ता.९) रक्षाबंधन सणाच्या मुहूर्तावर संध्याकाळी १०० टक्के भरले. पाटबंधारे विभागाने सायंकाळी सहा वाजता दिलेल्या आकडेवारीनुसार, धरणातील पाणीसाठा ११७.११ टीएमसीवर पोहोचला होता. यावेळी साठा ९९.७८ टक्के होता. त्यात रात्रीपर्यंत वाढ होत गेली व धरण भरले. धरण भरल्याने शेतकऱ्यांमधून समाधान व्यक्त केले जात आहे.
जलसंपदा विभागाकडून मिळालेल्या माहितीनुसार, धरणाच्या पाणलोट परिसरात झालेल्या सलग पावसामुळे पाणीपातळी सातत्याने वाढली. गेल्या काही दिवसांत धरणाच्या पाणीसाठ्यात दिवसाला लाखो घनमीटर पाण्याची वाढ होत होती. उजनी धरण भरल्यामुळे पुणे, सोलापूर आणि नगर जिल्ह्यांतील लाखो हेक्टर शेतीला पाणीपुरवठा सुरळीत होणार आहे. यामुळे खरीप पिकांच्या वाढीसाठी आणि रब्बी हंगामाच्या नियोजनासाठी शेतकऱ्यांना मोठा दिलासा मिळणार आहे. तसेच पिण्याच्या पाण्याचा पुरवठा निश्चित झाल्याने ग्रामीण आणि शहरी भागातील नागरिकांचा पाण्यावरील ताण कमी होणार आहे.
दरम्यान, हवामान विभागाने पुढील काही दिवसांत आणखी पावसाची शक्यता वर्तवली असल्याने धरण ‘ओव्हरफ्लो’ होण्याचा अंदाज आहे.

उजनीतून होत असलेला विसर्ग
भीमा नदीतून विसर्ग - बंद
वीजनिर्मितीसाठी - बंद
सीना माढा बोगदा - १८० क्यूसेक
दहिगाव उपसा सिंचन योजना - ८० क्यूसेक
मोठा बोगदा - ४०० क्यूसेक
मुख्य कालवा - १३०० क्यूसेक

05934