लेझर लाइटाचा वापर करू नये

इंदापूर, ता. १२ : आगामी दहीहंडी गणेशोत्सव आणि ईद-ए-मिलाद या सणांच्या पार्श्वभूमीवर जात, धर्म, पंथ, व्यक्ती, समाज यांच्या भावना दुखावतील किंवा ठेच पोहोचेल असे फ्लेक्स देखावे, कृत्य नृत्य संगीत होणार नाहीत याची दक्षता खबरदारी घ्यावी तसेच लेझर लाइटाचा वापर कोणीही करू नये. तसेच सोशल मीडियाचा वापर जबाबदारीने करावा. कायदा व सुव्यवस्थेचे काटेकोरपणे पालन करावे, असे आवाहन उपविभागीय पोलिस अधिकारी डॉ. सुदर्शन राठोड यांनी केले.
इंदापूर पोलिस ठाण्यात गणेशोत्सव, दहीहंडी उत्सव, ईद-ए-मिलाद या सणांच्या अनुषंगाने सार्वजनिक मंडळे, पोलिस पाटील व नागरिक यांची संयुक्त बैठक आयोजित करण्यात आली होती. त्यावेळी डॉ. राठोड बोलत होते. याप्रसंगी पोलिस निरीक्षक सूर्यकांत कोकणे यांच्यासह अन्य अधिकारी उपस्थित होते.

चौकट : नियमावली पाळा अन्यथा कारवाई
रजिस्टर नसलेल्या गणपतीमंडळांनी धर्मदाय आयुक्तांकडून तात्पुरता परवाना घेणे जरुरीचे आहे.
तात्पुरते अधिकृत वीजजोड घेणे.
पोलिस, नगर पालिका, ग्रामपंचायत, महावितरण यांची परवानगी प्राप्त करावी.
दिवसा व रात्रीच्या वेळी मूर्तीचे संरक्षण तसेच मूर्तीच्या दागिन्यांचे संरक्षणा करिता स्वयंसेवक, सुरक्षारक्षक नेमावेत.
गणेश मंडपात आग प्रतिबंधक उपाययोजना कराव्यात.
ध्वनिक्षेपकावर दिलेल्या मार्गदर्शक तत्त्वांचे पालन करण्यात यावे.
गणेशोत्सवात दर्शविण्यात येणारे देखावे, चित्रे हे चिथवणारे अथवा जातीयवादी नसावेत.
समाज विघातक कृत्य करणाऱ्या व्यक्तींना मिरवणुकीत सहभागी करण्यात येऊ नये.
मिरवणूक ही शासनाने दिलेल्या विहित वेळेत संपवावी याची खबरदारी घेणे.
जर नियमांचे पालन झाले नाही तर तत्काळ कारवाई करण्यात येईल.