समाज परिवर्तनामध्ये महिलांची भूमिका महत्त्वाची ः पवार

इंदापूर, ता. १३ ः ‘‘दैनंदिन जीवनात आज कुटुंबासोबत समाज परिवर्तनामध्ये महिलांची भूमिका महत्त्वाची आहे. यासाठी महिला सक्षम असाव्यात या उद्देशाने महिलांसाठी समृद्ध महिला अभियानाच्या माध्यमातून एक नवी चळवळ उभी करण्याचा प्रयत्न असून, यामध्ये महिलांनी सक्रिय सहभागी होणे आवश्यक आहे,’’ असे प्रतिपादन बारामती ॲग्रिकल्चरल डेव्हलपमेंट ट्रस्टच्या विश्वस्त सुनंदा पवार यांनी केले.
इंदापूर येथे ॲग्रिकल्चरल डेव्हलपमेंट ट्रस्ट, बारामती संचलित शारदा महिला संघ अंतर्गत समृद्ध महिला अभियान राबविण्यात आले. यावेळी पवार बोलत होत्या. यावेळी शहर व परिसरातील महिलांना व्यवसाय, शिक्षण, आरोग्य आदी विषयांवर मार्गदर्शन करण्यात आले.
पुढे बोलताना पवार म्हणाल्या की, ‘‘कौटुंबिक जबाबदाऱ्या पार पाडताना महिला स्वतःकडे लक्ष देण्याकडे दुर्लक्ष करतात. यामुळे आरोग्य, आत्मविश्वास आणि विकासाच्या अनेक समस्या निर्माण होतात. महिलांनी समाजातील परिवर्तनात नेतृत्व करण्यासाठी सक्षम व्हावे, यासाठीच समृद्ध महिला अभियानाची चळवळ उभी केली आहे. यामधून इंदापूर तालुक्यातील महिलांनी बचत गटाच्या माध्यमातून छोटे छोटे व्यवसाय उभा करून स्वतः स्वावलंबी बनण्यासाठी प्रयत्न करावे.’’
यावेळी सविता व्होरा यांनीही उपस्थित महिलांना मार्गदर्शन केले. याप्रसंगी छाया पडसळकर, आनंद थोरात, विजय बोडके, दीपक गरगडे, कृषी अधिकारी विकास सुरवसे, आसमा मुलाणी, रेश्मा रेडके, पूजा गुंजाळ, प्रेमचंद मोरे व महिला उपस्थित होत्या.