इंदापूर रास्ता रोकोप्रकरणी ६० जणांवर गुन्हा दाखल

इंदापूर, ता. १३ : हिंगणगाव पाटी (ता. इंदापूर) येथे पुणे- सोलापूर राष्ट्रीय महामार्गावर रास्ता रोको आंदोलन केल्याप्रकरणी सहा आयोजकांसह अनोळखी ५० ते ६० जणांवर इंदापूर पोलिस ठाण्यात गुन्हा दाखल केला आहे.
इंदापूर शहरातील वीरश्री मालोजीराजे यांचे समाधिस्थळ व गढीवरील अतिक्रमणाच्या विरोधात सकल हिंदू समाजाच्या वतीने पुणे- सोलापूर राष्ट्रीय महामार्गावर सोमवारी (ता. ११) दुपारी हिंगणगाव पाटी येथे रास्ता रोको आंदोलन केले. याबाबत पोलिस प्रशासनाने आंदोलन न करण्याचे केलेले आवाहन न पाळल्यामुळे गुन्हा दाखल केला आहे. याबाबत इंदापूर पोलिस ठाण्यातील हवालदार लखन साळवी यांनी दिलेल्या फिर्यादीनुसार, सदर आयोजक व आंदोलनकर्ते हे रस्त्यावर आंदोलनासाठी जमले असताना उपविभागीय पोलिस अधिकारी बारामती डॉ. सुदर्शन राठोड व इंदापूरचे पोलिस निरीक्षक सूर्यकांत कोकणे यांनी आंदोलनकर्ते यांना तुमच्या मागण्याबाबत प्रशासनाने कार्यवाही करीत अतिक्रमणाबाबत कारवाई सुरू केलेली असून जिल्हाधिकाऱ्यांच्या कार्यालयात बैठक नेमण्यात आलेली आहे. सदर बैठकीकरता आपण हजर राहावे, असे सांगून आंदोलन न करण्याबाबत वारंवार सांगून त्यांचे मन परिवर्तन करण्याचा प्रयत्न केला. परंतु, आंदोलनकर्त्यांनी महामार्गावर दोन्ही बाजूला जाणारी वाहतूक अडवून धरून येणाऱ्या जाणाऱ्या लोकांचा रस्ता अडवणूक करून लोकसेवकाने जारी केलेल्या आदेशाचे पालन न करता रस्ता रोको आंदोलन केले. यावरून सहा आयोजकांसह इतर ५० ते ६० अनोळखी व्यक्तींविरोधात इंदापूर पोलिस ठाण्यात गुन्हा दाखल केला आहे. या प्रकरणाचा पुढील तपास पोलिस निरीक्षक सूर्यकांत कोकणे यांच्या मार्गदर्शनाखाली सहाय्यक पोलिस निरीक्षक पुंडलिक गावडे करत आहेत.