इंदापुरात विद्यार्थ्यांना गणवेश वाटप

इंदापूर, ता. १४ : शहर व तालुक्यातील ३ हजार विद्यार्थांना इंदापूरच्या शहा परिवाराच्या वतीने नारायणदास रामदास ट्रस्टच्या माध्यमातून मोफत गणवेश वाटप करण्यात आले. शहा परिवाराच्या उपक्रमाचे हे ४० वे वर्ष आहे.
या सामाजिक उपक्रमाबाबत माहिती देताना श्री नारायणदास रामदास ट्रस्टचे विश्वस्त मुकुंद शहा व भरत शहा म्हणाले, ‘‘ट्रस्टच्या माध्यमातून दरवर्षी विविध उपक्रम राबवण्यात येतात. त्यातीलच एक भाग म्हणून दरवर्षी स्वातंत्र्यदिनानिमित्ताने शहा परिवारातील दिवंगत नारायणदासजी शहा, दिवंगत गोकुळदासजी शहा, दिवंगत सुरेशदासजी शहा यांच्या सामाजिक दातृत्वाच्या वारसा पुढे चालवत असून विद्यार्थ्यांनी आई-वडिलांच्या कष्टांचे मोल जपावे. अभ्यासक्रमाबरोबरच अतिरिक्त ज्ञान मिळवावे. अपयशाला घाबरू नका, तेच यशाकडे नेणारे पाऊल आहे.’’
यावर्षी दादासाहेब पाटील विद्यालय (कांदलगाव), राधिका विद्यालय (इंदापूर), हनुमान विद्यालय (अवसरी), श्रीनाथ विद्यालय (वडापुरी), मूक-बधिर व मतिमंद शाळा (इंदापूर), न्यू इंग्लिश स्कूल (इंदापूर), तरंगवाडी विद्यालय, आश्रम शाळा (इंदापूर) व कळाशी विद्यालय या शाळांमधील विद्यार्थ्यांना मोफत गणवेश वाटप करण्यात आले. दरम्यान, शहा परिवाराचा वारसा मुकुंद शहा, भरत शहा, निनाद शहा, अंगद शहा व परिवारातील सर्व सदस्य चालवत आहेत. त्यांच्या या उपक्रमाचे सर्वत्र कौतुक होत आहे.