इंदापुरात महिलेचा आत्मदहनाचा प्रयत्न

इंदापूर, ता. १६ : शहरातील प्रशासकीय भवन येथे शासकीय ध्वजवंदन कार्यक्रम सुरू होण्यापूर्वी एका महिलेने जमिनीच्या नोंदीच्या वादावरून आत्मदहनाचा प्रयत्न केला. यावेळी पोलिसांनी वेळेत संबंधित युवतीला ताब्यात घेतल्याने पुढील अनर्थ टळला. याप्रकरणी संबंधित युवतीच्या विरोधात इंदापूर पोलिस ठाण्यात गुन्हा दाखल केला आहे.
इंदापूर शहरातील नवीन प्रशासकीय भवन येथे असलेल्या ध्वजस्तंभाच्या ठिकाणी शासकीय ध्वजवंदन कार्यक्रम सुरु होण्यापूर्वी अचानकपणे नागरिकांच्या गर्दीमधून तोंडाला बांधून आलेल्या पूजा अल्केश ढमढेरे (वय ३२, मूळ रा. यशवंतनगर, अकलूज, ता. माळशिरस, जि. सोलापूर; हल्ली रा. मेन रोड, इंदापूर) या महिलेने ध्वजस्तंभाजवळ येऊन, मंडल अधिकारी इंदापूर यांनी त्यांच्याकडील तक्रार केसमध्ये माझे बाजूने निकाल दिला नाही, असे म्हणून सोबत आणलेल्या बाटलीमधून अंगावर ज्वलनशील द्रव्य अंगावर ओतून घेतले. त्यावेळी उपस्थित कार्यालयीन कर्मचारी व पोलिस कर्मचारी यांनी वेळीच सदर महिलेच्या हातातील बाटली काढून घेतली. त्यानंतर संबंधित युवतीला महिला पोलिस कर्मचारी यांच्या ताब्यात घेतले. संबंधित महिलेच्या विरोधात पोलिस हवालदार माधुरी शिवराम लडकत यांच्या फिर्यादीवरून गुन्हा दाखल केला आहे, असे पोलिस निरीक्षक सूर्यकांत कोकणे यांनी सांगितले.

संबंधित महिलेने तक्रार केलेल्या क्षेत्राच्या संदर्भात इंदापूर न्यायालयात त्यांनी दाखल केलेला दावा नामंजूर करीत फेटाळण्यात आला आहे. त्यानंतर त्या क्षेत्राशी संबंधात दुय्यम निबंधक यांच्यापुढे रीतसर खरेदीनोंदणी झाली आहे. त्यावरून तलाठी, मंडलाधिकारी यांच्याकडून कार्यवाही झाली आहे. यामध्ये सर्व प्रक्रिया ही नियमानुसार झाली असून, संबंधित महिलेचा तक्रार अर्ज निकाली काढण्यात आलेला आहे. त्यामुळे महिलेने घेतलेली भूमिका चुकीची आहे.
- जीवन बनसोडे, तहसीलदार, इंदापूर