इंदापुरात प्रभाग रचना आज होणार प्रसिद्ध

इंदापूर, ता. १७ : इंदापूर नगरपरिषद पंचवार्षिक निवडणूक २०२५साठी प्रारूप प्रभागांच्या भौगोलिक सीमा अधिसूचना सोमवारी (ता. १८) प्रसिद्ध करण्यात येणार असून, ३१ ऑगस्टपर्यंत हरकती नोंदविण्यास मुदत देण्यात आली आहे.
याबाबत इंदापूर नगर परिषदेचे मुख्याधिकारी रमेश ढगे यांच्याकडून देण्यात आलेल्या जाहीर प्रसिद्धीकरण नोटीसनुसार, प्रभाग रचनेच्या वेळापत्रकानुसार दिनांक १८ ऑगस्ट ते ३१ ऑगस्ट या कालावधीत प्रारूप प्रभाग रचना प्रसिद्ध करण्यात येणार आहे. सदर प्रभाग रचना कार्यालयीन वेळेत नगरपरिषदेच्या नोटीस बोर्डवर उपलब्ध असेल, तसेच नगरपरिषदच्या वेबसाइटवर उपलब्ध असेल. त्यावरील हरकती व सूचना नागरिकांनी हरकती व सूचना विहित वेळेत नोंदवाव्यात. इच्छुक नागरिकांनी आपली हरकती, सूचना नगरपरिषद कार्यालयातील आवक-जावक विभागामध्ये लेखी स्वरूपात सादर कराव्यात. हरकती व सूचना सादर केलेल्या नागरिकांना स्वतंत्रपणे सुनावणीसाठी वेळ देण्यात येऊन त्यांचे म्हणणे ऐकण्यात येईल. मुदतीनंतर आलेल्या हरकतींचा व सूचनांचा विचार केला जाणार नाही.