रेंगाळलेली इंदापूर नगरपरिषदेची प्रभागरचना जाहीर

इंदापूर, ता. १९ : चार वर्षांपासून विविध कारणांनी रेंगाळलेल्या इंदापूर नगरपनगरपरिषदेच्या पंचवार्षिक निवडणुकीसाठी प्रभाग रचना सोमवारी (ता. १८) जाहीर आली आहे. निवडणुकीसाठी दहा प्रभागांकरिता २० सदस्य निवडून देण्यात येणार आहेत. प्रभाग रचना विभागीय आयुक्तांच्या मंजुरीनंतर मुख्याधिकारी रमेश ढगे यांच्या सहीनिशी नगरपालिकेच्या नोटीस बोर्डावर लावण्यात आली. याबाबत सूचना व हरकतीसाठी ३१ ऑगस्टपर्यंत नोंदवता येणार आहेत.
इंदापूर नगरपरिषदेची मागील निवडणूक डिसेंबर २०१६ मध्ये झाली होती.त्यांची मुदत सन २०२२ मध्ये संपली. विविध कारणांनी गेली चार वर्षे निवडणुका लांबल्याने नगरपालिकेवर प्रशासक राज आहे. त्यानंतर आता न्यायालयाच्या निर्णयानुसार प्रशासकीय पातळीवर निवडणुकीच्या हालचाली सुरू झाल्या. यामुळे राजकीय हालचाली देखील आता गतिमान होऊ लागल्या. त्यामध्ये निवडणूक आयोगाकडून प्रभाग रचना जाहीर करण्यात आली आहे. यामध्ये शहरातील दहा प्रभागातून २० नगरसेवक निवडले जाणार आहेत. यापूर्वी नगरपालिकेत थेट नगराध्यक्ष व १७ नगरसेवक कार्यरत होते. नव्या प्रभाग रचनेनुसार थेट नगराध्यक्ष आणि २० नगरसेवक इतकी संख्या झाली आहे. नव्याने प्रकाशित करण्यात आलेली प्रभाग रचना काहींच्या सोयीची, तर काहींच्या अडचणीची झाली असल्याने कहीं खुशी कहीं गम पाहायला मिळत आहे.