इंदापुरात वाळू उपशाच्या दोन वाहनांवर कारवाई

इंदापूर, ता. ४ : इंदापूर तालुक्यातील उजनी धरण पट्ट्यातील गावांमधून होत असलेल्या अवैध वाळू उपशावर इंदापूर पोलिसांनी कारवाई केली असून, अवैध वाळू वाहतूक प्रकरणी दोघा जणांच्या विरोधात गुन्हा दाखल केला आहे. या प्रकरणात दोन वाहनांसह १३ लाख १८ हजार रुपयांचा मुद्देमाल हस्तगत केला. सूरज संजय तोबरे व समाधान गोरख शिंगाडे, असे गुन्हा दाखल केलेल्या आरोपींची नावे आहेत.
याबाबत नंदू बाळू जाधव (पोलिस शिपाई, इंदापूर पोलिस ठाणे) यांनी दिलेल्या फिर्यादीनुसार गुरुवारी (ता. ४) पहाटे साडेपाच वाजताच्या सुमारास उजनी पट्ट्यातील शिंगाडेवस्ती माळवाडी नं.२ (ता. इंदापूर) येथील जिल्हा परिषद शाळेसमोरील रस्त्यावर सूरज संजय तोबरे (रा. सरडेवाडी, ता. इंदापूर) व समाधान गोरख शिंगाडे (रा. माळवाडी नं.२ शिंगाडेवस्ती) हे सूरज तोबरे याच्या मालकीच्या आयशर कंपनीचे हायवा वाहनात (क्र. एमएच ४२ बीएफ ८२३९) व सुहास शिंगाडे यांच्या मालकीच्या एक टाटा मोटार्सच्या एन्ट्रा वाहनातून (क्र. एमएच ४२ बीएफ ५५६१) कोणताही परवाना न घेता वाळूची चोरी करून तिची वाहतूक करीत असताना मिळून आले. यावरून गुन्हा दाखल केला आहे. यावेळी दोन्ही वाहनात मिळून सुमारे १८ हजार रुपये किमतीची ३ ब्रास वाळू, तसेच दोन्ही वाहने, असा एकूण १३ लाख १८ हजार रुपयांचा मुद्देमाल हस्तगत केला. या प्रकरणाचा पुढील तपास पोलिस निरीक्षक सूर्यकांत कोकणे यांच्या मार्गदर्शनाखाली पोलिस हवालदार स्वप्नील कुंभार करीत आहेत.