इंदापुरात आज ओबीसी मोर्चा

इंदापूर, ता. ७ : येथील तहसील कार्यालयावर ओबीसी समाजाच्या वतीने आरक्षणात होत असलेली घुसखोरी रोखण्यासाठी सोमवारी (ता. ८) मोर्चा आयोजित केल्याची माहिती मोर्चाचे संयोजक पांडुरंग शिंदे यांनी दिली.
याबाबत देण्यात आलेल्या निवेदनानुसार ओबीसी प्रवर्गात मराठा समाजाची बेकायदेशीररीत्या होत असलेली घुसखोरी थांबवावी, मराठा बांधवांना ओबीसी मधून आरक्षण देण्यात येऊ नये, त्यांना स्वतंत्र आरक्षण द्यावे, या मागणीसाठी सर्व ओबीसी समाज संघटनांच्या वतीने येथील तहसीलदार कार्यालयावर मोर्चाचे आयोजन केले आहे. याप्रसंगी हैदराबाद गॅझेट शासन परिपत्रकाची होळी करून तहसीलदार यांना निवेदन देण्यात येणार आहे. सकाळी ११ वाजता श्री संत सावता माळी मंदिर सावतामाळीनगर येथून मोर्चाची सुरवात होणार असून त्यानंतर मेन बाजारपेठेतून तसेच खडकपुरा, नगरपालिका मैदान, पुणे सोलापूर जुना हायवेवरून तहसिल कार्यालयावर मोर्चाचे आयोजन केले आहे. तरी सर्व बांधवांनी वेळेवर उपस्थित राहावे, असे आवाहन पांडुरंग शिंदे यांनी केले आहे.