नारायणदास रामदास सेवक पतसंस्थेच्या अध्यक्षपदी भोसले

संतोष आटोळे, इंदापूर, ता. १५ : इंदापूर येथील श्री नारायणदास रामदास सेवक सहकारी पतसंस्थेच्या अध्यक्षपदी नितीन अप्पा भोसले यांची तर उपाध्यक्षपदी राजेंद्रकुमार मारुती बांडे यांची बिनविरोध निवड करण्यात आली.
इंदापूर शहर व तालुक्यातील नावाजलेल्या इंदापूर तालुका शिक्षण प्रसारक मंडळाच्या माध्यमिक शाळेतील शिक्षकांच्या या पतसंस्थेचे विद्यमान अध्यक्ष बापूराव जाधव व उपाध्यक्षा मीनाक्षी जाधव यांनी स्थानिक पातळीवर ठरल्याप्रमाणे आपल्या पदांचे राजीनामे दिले होते. यामुळे रिक्त झालेल्या अध्यक्ष आणि उपाध्यक्ष निवडीसाठी आयोजित संचालक मंडळाच्या विशेष सभेत निवडणूक निर्णय अधिकारी सहाय्यक निबंधक बी. के. शिवरकर यांनी काम पाहिले.
यावेळी निर्धारित वेळेत अध्यक्षपदासाठी नितीन भोसले व उपाध्यक्षपदी राजेंद्रकुमार बांडे यांचेच प्रत्येकी एक अर्ज दाखल झाल्याने त्यांच्या बिनविरोध निवडीची घोषणा केली. याप्रसंगी संचालक विकास फलफले, बापूराव जाधव, भारत डोंगरे, अरुण शिंदे, आदिक बोंगाणे, लहू शिंदे, भाऊ झगडे, वंदना शिर्के, जाधव मिनाक्षी उपस्थित होते. यावेळी सहाय्यक निवडणूक निर्णय अधिकारी म्हणून सचिव सुनील माळी व सहसचिव यशवंत केवारे यांनी काम पाहिले.
यावेळी मावळते अध्यक्ष बापूराव जाधव यांच्या हस्ते नूतन अध्यक्ष नितीन भोसले, नूतन उपाध्यक्ष राजेंद्रकुमार बांडे यांचा सत्कार केला तसेच इंदापूर तालुका शिक्षण प्रसारक मंडळाचे अध्यक्ष हर्षवर्धन पाटील यांनी नूतन अध्यक्ष व उपाध्यक्ष यांचे अभिनंदन केले.