‘वकील संरक्षण कायदा तातडीने लागू करा’

इंदापूर, ता. ३ : बार कौन्सिल ऑफ महाराष्ट्र आणि गोवा यांच्या निर्देशानुसार वकील संरक्षण कायदा तातडीने पारीत व्हावा, या मागणीसाठी इंदापूर वकील संघटनेच्या सर्व पदाधिकारी व सदस्यांनी सोमवार (ता. ३) रोजी न्यायालयात लाल फीत बांधून कामकाज करीत शासनाचे लक्ष वेधण्याचा प्रयत्न केला.
गेल्या काही काळात वकिलांवरील वाढत्या हल्ल्यांच्या घटनांच्या पार्श्‍वभूमीवर राज्यात वकील संरक्षण कायदा लवकरात लवकर लागू करावा, अशी मागणी राज्यभरातील वकील संघटनांकडून होत आहे. या पार्श्‍वभूमीवर इंदापूर येथील वकील संघटनेने या आंदोलनाला पूर्ण पाठिंबा दर्शविला.
यावेळी वकील बंधू भगिनी यांनी न्यायालयीन कामकाज न थांबवता शांत आणि प्रतीकात्मक आंदोलन करत हातावर लाल पट्टी बांधत आपल्या मागणीकडे शासनाचे लक्ष वेधण्याचा प्रयत्न करीत वकिलांच्या सुरक्षेसाठी कायदा लागू करण्याची मागणी केली. या वेळी इंदापूर वकील संघटनेचे विद्यमान तसेच आज-माजी पदाधिकारी, ज्येष्ठ वकील, सर्व सदस्य उपस्थित होते.