एस. बी. पाटील शाळेत रस्ता सुरक्षा जनजागृती कार्यक्रम

इंदापूर, ता. ११ : इंदापूर तालुक्यातील वनगळी येथील एस. बी पाटील पब्लिक स्कूल येथे ३७ व्या राष्ट्रीय सुरक्षा महिन्याच्या निमित्ताने रस्ता सुरक्षा जनजागृती उपक्रमास उस्फूर्त प्रतिसाद मिळाला. या उपक्रमाचे आयोजन पुणे सोलापूर एक्सप्रेस वे प्रायव्हेट लिमिटेड यांच्यावतीने केले होते.
या उपक्रमाच्या निमित्ताने रस्ता सुरक्षा विषयक नियमांचे पॉवरपॉईंट सादरीकरण व लघु शैक्षणिक व्हिडीओंच्या माध्यमातून विद्यार्थ्यांना वाहतूक नियम, सुरक्षित रस्ता वर्तन व जबाबदार वाहन चालवणे याबाबत मार्गदर्शन करण्यात आले.
सदर कार्यक्रम महामार्ग वाहतूक पोलिस यांच्या विशेष सहकार्याने पार पडला. यावेळी भारतीय राष्ट्रीय महामार्ग प्राधिकरणाचे जितेंद्र डेरे, प्रकल्प प्रमुख फणी कुमार, प्लाझा व्यवस्थापक सतीश चव्हाण, सुरक्षा अधिकारी वसीम मुल्ला, सिस्टिम असिस्टंट मॅनेजर दुष्यंत चौहान, डॉक्युमेंट कंट्रोलर गुलाब शेख आदी मान्यवर उपस्थित होते.
यावेळी अतिवेग, सीट बेल्टचा वापर न करणे, मद्यप्राशन करून वाहन चालवणे, वाहन चालवताना मोबाईलचा वापर ही महामार्गावरील अपघातांची प्रमुख कारणे असल्याचे मान्यवरांनी सांगितले. तसेच सीट बेल्टचे महत्त्व अधोरेखित केले. तसेच ‘दारू पिऊन वाहन चालवू नका’ हा इशारा दिला. यासोबतच रस्ता सुरक्षा फलकांचे प्रकार व त्यांचे अर्थ, तसेच वेगमर्यादेचे काटेकोर पालन केल्यास अपघात टाळता येतात, याबाबत सविस्तर माहिती देण्यात आली.
या कार्यक्रमाला विद्यार्थ्यांचा उत्साही व सकारात्मक प्रतिसाद मिळाला. ‘सेफ ड्रायव्हिंग, सेफ लाइफ’ हा संदेश प्रभावीपणे पोहोचला असून, भावी पिढीत रस्ता सुरक्षेबाबत जागरूकता निर्माण होण्यास मोठी मदत झाली आहे. अशी माहिती सतीश चव्हाण यांनी दिली.