इंदापूरमध्ये ८ अर्ज बाद

इंदापूर, ता. २० : इंदापूर तालुक्यातील जिल्हा परिषदेच्या ८ जागांसाठी ११४ व पंचायत समितीच्या १६ जागांसाठी २१३ उमेदवारांनी उमेदवारी अर्ज दाखल केले होते. यामध्ये गुरुवारी झालेल्या छाननीमध्ये जिल्हा परिषदेचा एक आणि पंचायत समितीचे सात अर्ज बाद झाले. अर्ज माघारीनंतर निवडणुकीचे चित्र स्पष्ट होणार आहे. मात्र, तालुक्यात खरी लढत घड्याळ विरुद्ध कमळ, अशीच असणार हे नक्की झाले आहे.
इंदापूरमध्ये अर्ज दाखल करण्याच्या अखेरच्या क्षणी मोठ्या राजकीय घडामोडी पाहायला मिळाल्या. यामध्ये कट्टर राजकीय विरोधक असलेले कृषिमंत्री दत्तात्रेय भरणे आणि माजी मंत्री हर्षवर्धन पाटील यांनी एकत्र येत घड्याळाच्या चिन्हावर समर्थकांचे उमेदवारी अर्ज दाखल केले. त्यामुळे दोन्ही पक्षातील अनेक इच्छुकांना उमेदवारी न मिळाल्याने नाराजांची संख्या मोठी होती. यावर भाजपच्या वतीने प्रदीप गारटकर व प्रवीण माने यांनी पक्षातील कार्यकर्त्यांसह राष्ट्रवादीतील नाराजांना बरोबर घेत आव्हान उभे केले आहे. त्यामुळे एकत्र आलेली राष्ट्रवादीची ताकद आणि सज्ज झालेली भाजपची फौज यामुळे निवडणूक रंजक होणार आहे.
या निवडणुकीच्या निमित्ताने नेत्यांनी आपल्या पुढच्या पिढीला राजकारणात आणले. यामुळे नाराजांची संख्या मोठी असून, यामधील अनेक इच्छुकांनी भाजपकडून अर्ज दाखल केले आहेत. त्यामुळे अर्ज माघारीच्या दिवसापर्यंत राष्ट्रवादीला या नाराजांची मनधरणी करावी लागणार आहे.