रोमणवाडी शाळेतील शिक्षकांची बैलगाडीतून मिरवणूक

जेजुरी, ता. १९ : रोमणवाडी (पांडेश्वर) येथील जिल्हा परिषद प्राथमिक शाळेचा ‘मुख्यमंत्री माझी शाळा सुंदर शाळा’ या महाराष्ट्र
शासनाने घोषित केलेल्या स्पर्धेमध्ये तालुक्यात प्रथम क्रमांक आला. प्रथम क्रमांक आल्याचे पत्र मिळताच येथील ग्रामस्थांनी
शिक्षक, केंद्रप्रमुखांची गुलाल उधळत बैलगाडीतून मिरवणूक काढली. रोमणवाडीची नुकतीच यात्रा झाली होती. पुन्हा यात्रा भरल्याचा
आनंद ग्रामस्थांच्या चेहऱ्यावर दिसत होता.
रोमणवाडी हे पुरंदर तालुक्यातील दुष्काळी क्षेत्रातील गाव. मात्र येथील लोकसहभागातून उभ्या राहिलेल्या शाळेने सर्वांगीण सुधारणा
केली आहे. तालुक्यात प्रथम क्रमांक मिळाल्याने शाळेचा नावलौकिक वाढला आहे. नुकतेच गटशिक्षणाधिकारी नीलेश गवळी यांनी शाळेचा
तालुक्यात प्रथम क्रमांक आल्याबद्दल मुख्याध्यापक कुंडलिक कुंभार यांच्याकडे पत्र सुपूर्त केले. त्यानंतर ग्रामस्थांनी मुख्याध्यापक
कुंभार, सहशिक्षिका वैशाली बांबळे व केंद्रप्रमुख सतीश कुंजीर यांची बैलगाडीतून गुलाल उधळत गावातून वाजत गाजत मिरवणूक काढली.
मुख्याध्यापक कुंभार व सहशिक्षिका बांबळे गेल्या सात वर्षांपासून शाळा सुंदर करण्यासाठी प्रयत्न करीत आहेत. त्यामध्ये येथील ग्रामस्थांची त्यांना चांगली साथ मिळाली. रोमणवाडी शाळेला वार्षिक स्नेहसंमेलनानिमित्त २ लाख ५० हजार रुपयांचा आर्थिक लाभ मिळाला. याचा फायदा शिक्षकांनी शाळेच्या भौतिक सुविधांसाठी खर्च करून शाळेचा कायापालट केला आहे.
डिजिटल शाळा म्हणून शाळेचा नावलौकिक तर आहेच पण तिची आणखी वेगळी ओळख निर्माण केली आहे. हसत खेळत अध्यापन करणारी शाळा,
व्यसनमुक्ती, अंधश्रद्धा, जीवदया, बालविवाह बंदी, पाणी आडवा पाणी जिरवा अशा विविध कार्यक्रमाच्या माध्यमातून विद्यार्थ्यांबरोबर समाजाचेही प्रबोधन केले जाते. शिक्षण आपल्या दारी, माझी शाळा, माझा फळा, भिंतीविना शाळा, शालेय स्पर्धा, परीक्षा पूर्वतयारी वर्ग, वर्चुअल लर्निंग,
विद्यार्थी व्यक्तिमत्त्व विकास, दिसेल ते वाचा, धाडसाने बोला, बाल संस्कार वर्ग, संगीत हार्मोनिअम शिक्षण यांसारखे दैनंदिन उपक्रमावर शाळेने ‘रोमणवाडी म्हणजे विकासाची गाडी’ असे ब्रीद वाक्य देखील तयार केले आहे.

तालुक्यात प्रथम क्रमांकाचे पत्र मिळताच ग्रामस्थांनी गावातील शाळा व्यवस्थापन समिती, ग्रामपंचायत सदस्य सर्व पदाधिकारी शिक्षण प्रेमी त्याचबरोबर विद्यार्थी व शिक्षकांची फटाक्यांच्या आतषबाजी आणि गुलालाची उधळण करून स्वागत केले. गावातून पारंपारिक पद्धतीने ढोल ताशांच्या गजरात बैलगाडीमध्ये बसवून भव्य मिरवणूक काढली. या मिरवणुकीला यात्रेचे स्वरूप आले होते. वाडीतून ही मिरवणूक जात असताना ठिकठिकाणी महिला
भगिनींनी शाळेतील शिक्षक आणि विद्यार्थ्यांना ओवाळून औक्षण केले. गावात सर्वत्र रस्त्याच्या दुतर्फा रांगोळ्या, फुलांच्या
पायघड्या घातल्या होत्या. त्याचबरोबर विद्यार्थी-शिक्षकांचे अभिनंदन गावात सर्वत्र पेढे वाटून केले.
या यशामध्ये पुरंदर पंचायत समितीच्या गटविकास अधिकारी डॉ. अमिता पवार, गटशिक्षणाधिकारी नीलेश गवळी, गटसमन्वयक सुरेश मोरे, केंद्रप्रमुख सतीश कुदळे त्याचबरोबर गावातील शाळा व्यवस्थापन समिती, आजी माजी सरपंच व पदाधिकारी आदींचे मार्गदर्शन लाभल्याचे मुख्याध्यापक कुंभार यांनी सांगितले.