कोळविहिरे, नाझऱ्यात बिबट्याची दहशत

जेजुरी, ता.३१ : कोळविहिरे, नाझरे व जवळार्जून (ता.पुरंदर) परिसरात बिबट्याचा वावर वाढला आहे. बिबट्याच्या दहशतीमुळे परिसरातील शेतकरी व रात्रपाळी करणाऱ्या कामगारांमध्ये भितीचे वातावरण पसरले आहे. यामुळे वनविभागाने बिबट्याचा बंदोबस्त करावा, अशी मागणी परिसरातील नागरिक, शेतकऱ्यांकडून होत आहे.
कोळविहिरे परिसरातील किर्लोस्कर फेरस लिमिटेड कंपनीचे वनराईचे क्षेत्र आहे. कंपनीच्या परिसरात मोठ्या प्रमाणावर झाडी आहे. या कंपनी भोवतालच्या झाडीमध्ये काही दिवस बिबट्या वास्तव्यास होता. वनविभागाच्या अधिकाऱ्यांनी येथे भेट देऊन बिबट्या असल्याची खात्री केली होती. त्यामुळे कंपनी कामगार व परिसरातील शेतकऱ्यांमध्ये भितीचे वातावरण होते.
कोळविहिरे, नाझरे सुपे व नाझरे कडेपठार, जवळार्जून परिसरात उसाचे क्षेत्र होते. बिबट्याचे दर्शन झाल्याने अनेक जण सांगत आहेत. दरम्यान, गेल्या दोन वर्षांपासून हा बिबट्या दिसत आहे. किर्लोस्कर फेरस कंपनीच्या झाडीमध्ये बिबट्याच्या वावर असल्याचे कामगार, सुरक्षा रक्षक यांनी पाहिले आहे. दरम्यान, वनविभागाने बिबट्याची माहिती संकलित केली आहे.

03199