जेजुरीत शुक्रवारपासून चंपाषष्ठी उत्सव

जेजुरी, ता. १९ : जेजुरीत मार्गशीर्ष शुद्ध प्रतिपदेला शुक्रवार (ता. २१) पासून खंडोबाच्या चंपाषष्ठी षडरात्र उत्सवाला प्रारंभ होणार आहे. बुधवारी (ता. २६ ) चंपाषष्ठी दिवशी या उत्सवाची सांगता होणार आहे. या उत्सवानिमित्त सहा दिवस गडावर विविध धार्मिक कार्यक्रमाचे आयोजन केले आहे. कुलधर्म कुलाचारासाठी मार्गशीर्ष महिना आणि चंपाषष्ठीचा काळ महत्त्वाचा मानला जातो. त्यामुळे लाखो भाविक या काळात खंडोबाच्या दर्शनासाठी येतात.
शुक्रवारी (ता. २१) पाखळणी झाल्यानंतर सकाळी दहा वाजता करवीर पिठाचे आद्य शंकराचार्य नृसिंह भारती यांच्या हस्ते घटस्थापना होणार आहे. मार्गशीर्ष महिन्यात खंडोबाचे सहा दिवस घट बसतात. त्यानिमित्त येथे कलावंत हजेरी लावतात. दररोज हजारो भाविकांना अन्नदान कार्यक्रमाचे आयोजन केले जाते. मार्तंड विजय ग्रंथ पारायण, मल्हारी सहस्रनाम याग, देवदिवाळी आदी धार्मिक कार्यक्रमाचे आयोजन केले जाते. सोमवारी (ता. २४) देवांना फराळाची आरास (अन्नकोट) करण्यात येणार आहे.
मंगळवारी (ता. २५) खंडोबाला तेलवण आणि हळदीच्या कार्यक्रमाचे आयोजन करण्यात आले आहे. गावात तेलहंडा फिरविला जातो. त्यानंतर रात्री तेलवण आणि हळदीचा कार्यक्रम होतो. मंगळवारी सायंकाळी हा कार्यक्रम होणार आहे.
बुधवारी (ता. २६) चंपाषष्ठीचा मुख्य दिवस आहे. घट उठविल्यानंतर भाजीभाकरीच्या महाप्रसादाचा कार्यक्रम होणार आहे. दररोज दुपारी बारा ते सायंकाळी पाच पर्यंत महाप्रसादाच्या कार्यक्रमाचे आयोजन करण्यात आले आहे. दररोज दुपारी चार ते सायंकाळी सात या वेळेत वाघ्या मुरळी यांचा हजेरीचा कार्यक्रम असणार आहे. अशी माहिती पुजारी सेवक वर्गाचे गणेश आगलावे यांनी दिली. सहा दिवस गडाच्या भोवताली आणि मंदिरात विद्युत रोषणाई करण्यात येणार आहे.